U SP ka West Garo Hills da pyntip u wa ha ka tayaw wa da dep da leh ya kiwa boon ki kaam ha kiwa boon ki District ka Ri-loom Garo deiwa ya krehlang wa ki pulit ka West Garo, South Garo wa North Garo Hills heiwa da ye wow kem ya ki dkhot ka seiñ kieñ suloi kawa dang sdang wot ha Ri-loom Garo kawa da e pyrtuid ka A’chik National Socialist Council (ANSC).
Ha i lai kynreh, lai thooh ki pulit da yoh wow kem ya u Chairman ka ANSC wa tip kam u Chekam Ch Sangma na Hawakhana, Tura ha ka 25-09-21 deilang wa ki kot ki sla nadooh kiwa thoh dei kti, ki Pocket Dairy wa kiwi kiwi de na oo.
Ha i takit ya u Chekam, da phla u wa deilang wa kamwa 25-30 ngut kiwa em yei jooh i thmu da pynkhreh ki ya ka Constitution wei da pynlang tiar yasiat ki yow leh ya ki kaam rah bor, i dawa poisa wa kiwi kiwi de.
Yei thap dkhot wa i e sikai ya ki da thmu wow sdang hadien wa biang ki tiar yasiat.
Heiyatoh wa ini kiwa da chah kem man ki kamni ha wah:
Chekam Ch Sangma (Chairman)
Wallison B Marak (Vice Chairman)
Chijang A Sangma (Member)
Arbas B Marak (Member)
Raking A Sangma (Member)
Chekam R Marak (Member)
Hereson K Sangma (Member)
Daniel B Marak (Member)
Daniel B Marak (Member)
Nathalie R Sangma (Member)
Da em leh sa kamwa 15-20 ngut ki wym pu tipmit kiwa suba wa man kam ki dkhot wei dang thooh ya ki.
Da yoh leh wow kem ya 2 tylli ki suloi SMBL wa kawi ka 9 mm Pistol na kini ki dkhot.
Da phla ki leh wa emkti ki hei wow khayi tooh ya ki tiar yasiat wa kiwa boon ki kaam tooh kari ha Ri-loom Garo.
Chooh chooh da khana ki leh wa da thmu ki wow sdang ya kawi ka NGO kawa e pyrtuid ka AKMA yow dawa poisa hei pyrtuid yong ka neibynta ka seiñ kieñ suloi ki.
