Ki pulit ka Meghalaya da yoh ki wow kem ya ki bru wa emkti wow yahbor ya ki kynthai deiwa kular wow pynbia ki tangwa da dai won ki manda poi chapoh kiwi ki jylla. Heiyatoh wa ini da kem ya le ngut kiwa man ki heh wa soohbuit wow leh yeini.
Hawa pyntip chaphang ini, u SP ka Ri Bhoi, u V. Rathore, da ong u wa i takit chaphang ini da sdang ko nadooh u bnai June 2025 hadien wa wiar kawi ka kynthai na Byrnihat heiwa da chem wa chah rah ko cha Rajasthan wei da dai ka hei dor wa Rs. 3 lak wei da pynbia yabor ka.
Ya kani ka kynthai da chem ka deiwa yarap ki pulit ka Rajasthan.
Kini kiwa chah kem toh kiwa tip kam u Md Khalil Ali (31 snem) uwa kut siñ kam Budu uwa na Karabori, Kamrup, Assam, u Rajesh Singha (31 snem), uwa na Kumarghat, Bercherra, Tripura wa ka Monika Rabha klawa na Mawalgarh, Rjasthan (28 snem).
Kini ki le ngut toh kiwa pynemkaam da ki rynsan Social Media yow pynyatohlok wa ki bru wei hadien wa yoh yei chaniah ki, da pynbiej ki ya ki wow lai ki cha baar jylla heiwa em i por deiwa kular wow yoh kreh wei em won ki por yow yoh bia.
Ki pulit da ngait ki wa kini ki bru dadep ki wow rahbor ym duna ya 5 ngut na Assam wei kawi na Tripura ha kini ki ar snem.
U SP da kyntu u ya ki paidbah wow man kiwa husiar neibhah i leh thok katni toh wot lyngba ki UPI wei ki khynnah wa pynemkaam Social Media toh u syndong bha ki manda yaklam ki wa ki bru wym tipmit kamjooh hawa Install ya ki App wym yoo tikna.
Discussion about this post