Ki Anti-Narcotics Task Force (ANTF) ka East Jaiñtia Hills District deilang wa ki pulit ka Anti-Infiltration Umtyra CP ynne i step da yoh ki wow kem ya arngut ki bru kiwa kit ya u bhang wa khia 71.476 Kg na kawi ka kari.
Kani ka kari Maruti SX4 toh kawa em ya u Number AS-01AN-3312 wei da tip chwa ki pulit wa daw wan ko deiwa kit ya ki mar pynmuaid kiwa mih na Kalain yow lai cheiliang Khliehriat.
Kamtæ da pynyieñ thaw pynsangeh kari wei heipor kamwa 6:15 ynne i step heipor wa kani ka kari dang wan ko neiliang Lumshnong da pynsangeh ka wei da kem leh ya ki arngut wa em hapoh.
Hawa kynreh ya kani ka kari da chem ya 117 tylli ki yusong kiwa murieh bha hadien ka kari deiwa ah thlu ha ka bahen, hapoh ki bynta wa em ki Brake Light wa hapoh u Bumper.
Kiwa chah kem da tip kam u Babalu Singh (56 snem) uwa na Patna, Bihar wa u Suranjan Mahto (39 snem) uwa na Jahangirpur, Bihar. Na kini da kem leh ar tylli ki Mobile Phone.
Ya kani da pynngat hapoh ka aiñ NDPS Act wei dang pynman ya ka takit yow chem ya kiwi de kiwa emkti ha ini i kaam.
