U SP (City) ka East Khasi Hills da pyntip u wa heiyatoh wa iwa jia ha Ichamati wei i chah pynyap u Sobir Dutta, da yoh wow kem ya u Cleenstar Shabong (27 snem) uwa sah ha Nongthymmai, Pohktieh ha Shillong haka 23 tarik uni u bnai wei da li yah oo hakhmat ka yung bichaar u District & Session Judge ynne heiwa da phah kset oo ha kti ki pulit 7 sngi yow takit.
Da pyntip leh wa u Cleenstar toh uwa da emkti ha 10 tylli kiwi ki kaam pyrchah aiñ wei na kini da chah Charge Sheet u ha kawi ka Case. U SP da pyntip u leh wa dang thooh ya kiwi de kiwa emkti ha kani ka kaam pynyap bru.
Heiyatoh won wa iwa jia ha Mawroh, Mawlai heiwa da em uwa kreh mylla uwa tip kam u Arjun Ray uwa da chah pynyap, da yoh wow kem ya u Gary Rinaldy Mawlieh (25 snem) uwa chong wa sah ha Mawroh, Mawlai haka 23 tarik uni u bnai.
Ya uni leh da yah hakhmat ka yung bichaar ynne ka sngi heiwa da phah wow kset ya oo 12 sngi ha kti ki pulit. Da pyntip wa uni leh toh uwa da emkti ha ki 3 tylli ki kaam pyrchah aiñ heiwa da chah Charge Sheet u ha ki ar tylli ki Case wei hajrong ini dang pynman leh yei takit yow tip wei wow kem ya kiwi de kiwa emkti lang.
Neiliang u President ka KSU da pyntikna u wa waroh ar kini toh ki dkhot ka KSU.
Discussion about this post