Ki pulit ka Assam da kem ki ya u District Transport Officer (DTO) ka East Garo Hills hadien wa da suba wa emkti u wow chna thok ya ki kot ki sla kari wa kynthup ya ki Registration Certificate.
Uni u DTO toh uwa tip pyrtuid kam u Genekelly G Momin wei da kem ya oo ynnin ka sngi hadien wa ki pulit ka Assam da kem chwa ki uwi u bru uwa tip kam u Golam Ali uwa chong wa sah ha Bhatipara ka Goalpara District, Assam uwa kreh deiwa dai kari wei da phla u wa ki kot ki sla ki kari wa em u toh kiwa da chna thok deiwa pynykylla ya ka Engine Number wa Chassis Number deiwa yarap u DTO ka East Garo Hills wow pynbiang ki kot ki sla.
Ki pulit da kem ki leh ya soo tylli ki kari uni u bru heiwa kawi ka Swift Dzire toh kawa em Number Meghalaya (ML-07C-1786) heiwa kani ka kari da chem wa i Engine Number toh yong kawi won ka kari katwa u Chassis Number won ymtoh uwa da pynmih da ka Maruti tangwa u DTO won da e bait u ya ka Registration Cetificate
Ini waroh da sdang i heipor wa pynsangeh kari ki pulit ha ka 4 tarik uni u bnai da ki pulit ka Agia Police Station heiwa da chem wa ki kot ki sla ki kari u Golam Ali toh kiwa suba wa da chna thok wei manda takit ya oo da phla u wa da yoh yarap u wow leh yeini da u DTO ka East Garo Hills wei hadien wa pynbiang ki pulit yei sabut da lai ki wow kem ya u DTO.
Da suba leh wa da em kiwi ki kari wa da chna thok ya ki kot kari wei iwa rap phylla toh wa ini wa dep da iñ ka yung krehkaam u DTO ha Williamnagar, East Garo Hills wei da suba wa em wa leh chynnam yow pynwiar ya ki sabut.
Neiliang ki pulit ka Assam da e khublei ya ki pulit ka Meghalaya yei ya krehlang ki.
