U Gabriel K Iangrai uwa jooh man kam u Assistant Inspector-General (Administration) ka Meghalaya da kem noh ya oo da ki pulit ka Meghalaya heiyatoh wa ki kaam wa chah pynbaad u wa emkti u wow thied kari pulit pyrchah ya ka aiñ heipor wa ksoh u ya ini i kyrdan uwa hadien won da man u kam u Commandant SF-10.
U Iangrai da chah pynbaad u wa da thied u 29 tylli ki kari pulit da ka poisa sorkar kiwa da booh u ha Police Officer Mess lane ha MPRO Complex katwa ya ki chabi da booh ha yung wa sah u. Wei ya kini ki kari da thied u khlem em yoh bor naka sorkar.
Ki pulit ka Special Investigation Team (SIT) ynne i step da lai kem ki ya u Iangrai na yung sah u wa em ha Shyiap Golflink, Shillong heiwa nyngkong ym em u ha yung.
Neiliang ki pulit da psiah ki cha yung u wei da thooh ki ya oo tangwa hadien wa ka High Court da kyntait ko wow e jamin ya oo ynne hi ka sngi, da liwan u cha yung heipor kamwa 1:00 waje i sngi heiwa da kem noh ya oo da ki pulit wei na yung u Iangrai da yoh leh wow kem ya ki kot ki sla deilang waka poisa wa kiwi de ki sabut.
Ki pulit da pyndep ki ya iwa emkaam hei wow leh ya ka Medical Examination wei da rah noh ya oo cha thanat heiwa daw takit noh ya oo pyn myntu hi ka miet.
Katkam kam ki kyndon ka Meghalaya Discipline and Appeal Rules waroh kiwa chah kem toh kiwa da kheiñ kam kiwa chah Suspend.
Heiyatoh wa ini i kaam da em leh ka mukotduma PIL wa da yaleh ha ka High Court ka Meghalaya neidaw wym em chimkhia ka sorkar wow leh iyi iyi heiyatoh wa ini i kaam heiwa ka yung bichaar da pynmih ko ya ka Rule of Contempt pyrchah ya u Secretary ka Home Department wa pynthut u yei takit iwa man leh pyrchah ya ka hukum ka High Court.
Ynne da chong bichaar biang ya kani ka PIL heiwa ka sorkar da e ko yei jubab wa bniah ya iwa da leh ko heiyatoh wa ini hadooh wa kammon da Charge-Sheet heiwa da thung leh ya u Inquiry Officer wei da takit ya 43 ngut kiwa man kam ki sakhi ha ini i kaam.
Ka sorkar jylla da pyntip ko leh wa i pynemkaam bakla ya ka poisa dapoi ko palat T. 3 klur.
Neiliang ka High Court da hun ko ya ini i leh ka sorkar, kamtæ da pyndam noh ya ka Rule of Contempt pyrchah ya u Secretary ka Home Department.
Ka High Court da yooluti ko leh wa waroh ka poisa paidbah wa da chah pynemkaam bakla u yoh biang ka wei wow pynchitom ya uni uwa emkti.
Daw chong bichaar biang ya kani ka mukotduma ha ka 25-11-22.
Kam wow kdaw heini, ha ka 28 tarik u Naichiphaw, ka CID da dep ko wow Registere Case pyrchah ya u Iangrai hapoh ka Prevention of Corruption Act.
Hadien ini da thung da ka Special Investigating Team (SIT) wa khleh da u inspector General (Law & Order), u Mukesh Kumar Singh.
Najrong ini chah pynbaad thied kari, u Iangrai da chah pynbaad u wa emkti u ha ki kaam baam-tooh heiyatoh wei pynkrehkaam ya ka National Emergency Response System (NERS) ha Sadar Police Station.
