Arngut ki bru wa kynthup ya u Head Constable ka Manipur Police, da chah kem ki deilang wa chiboon bha i drug Opium wa i Brown Sugar wa chongdot T. 90 klur na Thoubal District ka Manipur ynnin ka 1 tarik.
Hadien wa da tip da iwa tikna, ki pulit ka Imphal East District Police Narcotic Cell deilang wa ki pulit ka Thoubal District Commando wa ki Andro Police Station da kem ki ya ini heipor 1:30 i step synyaw.
Ya ki drug deilang wa kiwi ki tiar da kem na i yung u Md Mujibur Rahman (42 snem) heiwa u Mujibur toh u wakreh hapoh ka Manipur Police kam u Head Constable ha Tamenglong District.
Najrong kiwa boon ki jait tiar wa pynemkaam yow chna drugs, da yoh leh 11 tylli ki muna wa em 430 Kg u Opium wa 40 Kg iwa suba toh i Brown Sugar kiwa da song ha ki le tylli ki muna kiwa da antaad wa chongdor T. 90 klur.
Ha i takit ki pulit, u Mujubur da pyntip u wa ya ini i drug da chna da oo katwa u Md Hero uwa na Thoubal Moijing toh uwa lai dai ya i Brown Sugar wa da chna kyrpang wei da kit ya ki mar wa emkaam wow chna drug da u Md Firoj uwa na Yairopok Tulihal Toubokpi.
Kamtæ ki pulit da lai ki wow kem ya u Md Firoj (19), ha ka jooh ka sngi. Ki pulit da kem ki leh ya kawi ka kari Bolero kawa em ya i Sticker ka National Highway & Infrastructure Development Corporation Limited (NHIDLC) heiwa ha tre ka yit da thoh “On Govt. Duty”.
Neiliang u Chief Minister ka Manipur, u N Biren Singh da pynbna u T. 10 lak kam i e sñiawbha cha ki pulit kiwa da emkti wow yoh kem ya kini ki bru deilang wa i drug.
