Hadien wa em hadooh 9 tylli ki kor ATM wa chah leh pynsih ha Shillong, neiliang ki pulit ka East Khasi Hills da yoh ki wow kem ya uwi u bru heiyatoh wa ini i kaam wei kini ki kor ATM toh kiwa em ha Rynjah, Madanrting wa Laitumkhrah.
Kini ki ATM toh kiwa em 5 tylli ha Rynjah, 2 tylli ha Laitumkhrah wa 2 tylli ha Madanrting.
Ki pulit da yoh ki wow kem ya uni u bru uwa em 29 snem i rta ha ka 28 tarik uni u bnai hadien wa da em hadooh 9 tylli ki Case wa yatoh wa ini i kaam wa da takit da ki pulit ka Rynjah Police Station, Laitumkhrah Police Station wa Madanrting Police Station wei yeini i kaam da leh uni u bru deiwa tympra, khyndang hei miet heipor wa dooh bordiñ.
Ya uni u bru da yoh wow kem deiwa yahkhmat ki pulit ka Rynjah Police Station wa kynthup ya ka DSP (L&O), ka Jyoti Wahlang, MPS wa u ASP, u Dewansh Pandey, IPS heiwa uni u bru da phla u yeini iwa da leh u ya ki kor ATM wa em ha Madanrting, Laitumkhrah, Rynjah wa ha Laban.
Ya ki that, ka muna waka satri wa da pynemkaam u heipor wa leh yeini i kaam da yoh wow kem na i yung wa sah u wei i lutsan da ini wa leh u dapoi i hadooh T. 10 lak.
Ki pulit ymem khana ki yei pyrtuid uni u bru tangwa da dep ki wow wanrah ya oo hakhmat ka yung bichaar wei dang pynman yei takit yow tip wa lada emktilang kiwi wei kammon da leh yow khyndang ya kini ki kor ATM.
