Ka National Investigation Agency (NIA) da pyntip ko wa ynne ka 11 tarik da kem ko ya 6 ngut ki bru wa emkti ha ki kaam wow khayi tooh ya ki bru iwa da leh ha ki thaaiñ khappood ka Assam, West Bengal wa Meghalaya deilang wa kiwi ki bynta ka ri heiwa da lai kynreh ha kiwa boon ki thaw wa em ha Assam, Meghalaya waka Karnataka.
Kani ka takit toh yei pynpsiah tooh ya ki Rohingya Muslim chapoh India yow pynman tre chnong ki deiwa pynemkaam da ki kot ki sla wa chna tooh wei da pynngat ya kiwa chah kem hapoh ka Section 370 wa 370 (A) ka IPC.
Uwa yahkhmat ya ini toh uwa pyrtuid Ahmed Chaudhury uwa da leh yeini i kaam na Bengaluru deiwa em boon ki bru wa krehkaam lang wa oo ha kiwa boon ki bynta ka ri.
Kiwa chah kem ynne ka sngi toh u Ahmed Chaudhry uwa na Cachar, Assam uwa da sah katni ha Bengaluru wei da tip pyrtuid ya oo leh kam u Asiqul Ahmed. Kiwi de toh u Sahalam Laskar uwa tip leh kam u Alam Laskar uwa na Cachar, Assam, u Ahiya Ahmen Choudhury uwa na Cachar, Assam, u Bapan Ahmen Choudhury uwa na Cachar, u Jamaluddin Ahmed Choudhry uwa na Cachar Assam wa u Wanbiang Suting uwa na East Jaiñtia Hills, Meghalaya.
Ha ini i kynreh da ka NIA da yoh leh wow kem chiboon ki kot ki sla wa kiwi ki tiar ki tar wa man kam ki sabut wa leh kini ki bru ya ini i kaam.
Ka takit dang lai ko chakhmat.
