Kamwa da sdang ka samoi u sapieñ, ki pulit da chem ki yeiwa pynemkaam dawai yow pynsmat u ih uni u soh hapoh ka sor Hyderabad.
Ki pulit ka Goshamahal Police Station da kem ki ya uwa 32 snem i rta uwa tip kam u Kunal Nokatwale uwa khayi soh heiwa yeini da chem hajan ka Balkishan Mandir ha Chudi Bazar ha ka 3 tarik uni u bnai.
Ki pulit da pyntip ki wa uni u bru da pynemkaam u da i “Diamond Ripe – Ethylene Ripener” yow pynih smat ya u soh yow ye u dai smat cha ki yaaw ki haat. Heini i lai kynreh ki pulit da chem ki soo tylli ki yusong ini i dawai, wa 25 tylli ki yusong khian (Sachet) ini hi i dawai deilang wa 200 Kg u sapieñ.
Ini wa leh uni u bru man ko pyrchah ya ka aiñ heiwa da pynngat oo ha ki kyndon wa pynmaa u yei chait i khiah ki paidbah.
Neiliang ki pulit da ong ki wa uni u bru da pynemkaam u yeini i dawai palat ya pood wa chah yow yoh nong u chiboon khlem da pyrkhat ya ki bru wa baam ya uni u soh. Da ong leh wa ki pulit u pteiñ ki wow lai kynreh ya kiwi ki thaw ha ki yaaw ki haat deilang ki kudam.
Ini i dawai toh iwa pynman ya u sapieñ wow stem bha i rong i snieh heiwa da kyntu ya ki paidbah wym toh u thied ya u soh du neidaw wa stem bha u neibhah chapoh ye u man uwa da sih wa em ki dawai wa ktah yei chait i khiah.
Da ong wa u sapieñ wa ih dei bor yong oo hi, rap khleh rong u tangwa kiwa da em dawai won stem bha ki wei lada baam ya kini ye wow booid u chyoh, u syuiñ, u prai, u sooh kpoh wei pynhiar.
Chooh chooh da ong wa soh wa em dawai toh rap sma haroh u.
Discussion about this post