Chah kem uwa thok u yarap yoh kreh sorkar

Jowai : Uwi u bru wa tip pyrtuid kam u Armos Pasam wa 28 snem i rta na Nongthymmai Lawjynriew, Shillong ynne ka sngi da wanrah ya oo cha Jowai Police Station daka seiñ HNYF Mawlai Circle waka HNYF West Jaiñtia Zone neidaw wa uni u bru chim poisa u na kiwa boon ki bru deiwa kular u u yarap yoh kaam sorkar ya ki.

Na Jowai da chah thok le ngut. Na kini ki le ngut toh arngut ki chi payu heiwa ka bei ki da e ko T. 1,02,000 neibynta ki arngut ki khon kynthai nadooh ka 14 Khonchonglad (November) 2013.

Ha uni u snem u Amos dawan e kti u ya ki ‘Appointment Letter’ heiwa da kam u wada yoh kreh ki khon kani ka kong kawi kam ka Nurse hapoh NEIGRIHMS ha Shillong wa sa kawi ka khon won ko ha Soil & Water Conservation Department kam ka Junior Clerk heiwa ha kini ki chithi da ong wa toh u sdang kreh noh ki waroh arngut nadooh ka 15.01.16.

Ya u Amos da tipmit chwa ya oo daka khon yong kani ka kong heipor wa dang lai puræ nurse ka khon ko ha Guwahati.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Uni u bru leh da chim u T. 32,000 sa na kawi ka lok yong kani ka kong wei da e u ha ka leh ya ka ‘Appointment Letter’ yow kreh kam ka nurse hapoh NEIGRIHMS, Shillong.

Na Shillong leh da chim poisa u na kiwa boon kiwa emyatoh u kiwa kynthup ya le ngut kiwa chi payu kiwa sah ha Mawlai heiwa na u ma u da chim u T. 85,000 wei da e ‘Appointment Letter’ u ya oo wa da yoh kreh u hapoh ‘Indian Railways.’ Na uwi won u ma u da chim u T. 1,00,000 katwa na kawi won T. 20,000. Na sa na uwi u ma u da chim u T. 43,000 yow yarap yoh kreh Nurse ya ka khon u. Kamni da chim poisa u na 8 ngut da phla uni u Armos.

Yow pynbiej ya kini kiwa e poisa cha oo da em leh ki bru wa phone cha ki kiwa kam toh man ki kamki Medical Officer ka NEIGHRIMS, u Joint Secretary ka Soil and Water Conservation wa ki Medical Specialist.

Yaki kot ki sla da phla u Armos da chna da uwi u bru wa tip kam u Stephan Tyrki uwa sah ha Khanapara, Assam. Wei kiwa yoh ya kini ki ‘Appointment Letter’ da tip ki wa chah thok ki neibhah da thoh i jooh ki kyntien wei da soi leh da i jooh bait.

Ya ka FIR da booh ha Jowai Police Station chibnai chwa tangwa hadien wa da kular uni u bru u pynuiñ yaka poisa da e por ya oo chi bnai wei da kut ini i chibnai ynne ka 31 tarik wei ympu em pynuiñ u yaka poisa yong kini ki bru.