Ka Central Executive Committee (CEC) yong ka Jaiñtia National Council (JNC), ynne ka sngi da pynman ko i lai kynreh Trading License syndet wa Service License ha chnong Khliehriat West, kawa man ka Headquarter yong ka East Jaiñtia Hills District.
Ka seiñ ong ko wa yeini i lai kynreh da leh katkam i kyndon yong ka JHADC Trading by Non-Tribal Rules, 2015, heiwa da emlang kiwa kreh ka JHADC.
Hawa klam cha kiwa thoh khubor, u General Secretary ka JNC CEC, u Wanshwa Suting khana u wa ini i lai kynreh syndet ka seiñ toh hadien wa yoo ko yeiwa da boon ware ki bru baar jylla wa pynlai ya ki dukan wa ki kaam khayi ha East Jaiñtia Hills.
Wei i thmu wa kongsan ini i lai kynreh toh yow pynsakhiat wa la kini kiwa pynlai yei khih i khan em hi ki mo ya ki License wa ki kot ki sla wa biang, neibhah i wym em License wa ki kot ki sla toh kawi na ki daw wa khroo wow pyndooh nong nei yoh dan ka JHADC.
Katkam i pyntip u General Secretary, ong u wa ha kani ka sngi da chem ki boon ki dukan wa ki thaw krehkaam wym em biang ya ki License wa ki kot ki sla wa emkaam, najrong wa em leh kiwa krehkaam pyrchah aiñ khlem em kawon kawon ka License næ ki kot ki sla wa emkaam.
Ong u wa ini ktah ko ym du ya ka dan ka JHADC tangwa wanrah ko leh i eh wa khroo ya ki bru tre ri, khamtam wa chah knieh i khih i khan wa ye u leh da ki bru yong i hi.
Hadien wa dep pait sylli ya ki dukan wym em biang License kamjooh ki kot ki sla, neilang ka seiñ da khang ko wei e ko leh i maham ya kiwa pynlai da kiwa na baar wei neiliang ki bru ka JHADC leh da maham ki ya kini.
U Wanshwa ong u leh wa ya ki thaw krehkaam kiwa em ya ki License khayi wa biang tangwa ym em won ki ya ki kot ki sla wa emkaam, kamtæ da e por ya ki chi tayaaw u pynbiang, wei lym leh ki hapoh i por wa da booh, ka seiñ daw pynchitom ko deiwa khor.
Discussion about this post