Kiwa lai puræ ka skurbah ka North Eastern Hills University (NEHU) da khrwait ki ya u Vice Chancellor ka NEHU, u Prof. Prabha Shankar Shukla deiwa ong wa yachah wei wanrah u ya u Registrar u wym tip iyi iyi ya ki aiñ ki kyndon ka NEHU.
U President ka NEHUSU, u Sandy Sohtun da pynbaad u wa u Registrar uwa thung hi u Vice Chancellor ka NEHU ym tip u iyi iyi ya ki kyndon aiñ ka NEHU wei dang rap tip kiwa lai puræ.
Da ong u leh wa ym pu chem ya u Registrar uwa kam uni u wym em i chemphang kajiak leh yei kreh wei da dawa u wow mih noh u na NEHU neibhah wym emkaam ya oo.
Iwa da pynchrai ya kiwa lai puræ toh wa u Vice Chancellor da yachah ware u ya uni u Registrar wot hawa da dawa ki wow mih noh u na kamra ka yalang ka 113th Academic Council tangwa ym bien u iwa da pynman ya ki wow mih ki plak na ka yalang.
Kamtæ ka NEHUSU deilang ka KSU NEHU Unit da khang tala ki ya ka yung krehkaam u Registrar, u Colonel (Rtd) Omkar Singh deiwa beh ya oo napoh ka kamra krehkaam u.
Da dawa ki leh na u Vice Chancellor wow beh kreh noh ya u Singh neidaw wym man u uwa biang wow leh yei kaam u.
Neiliang won u NEHUTA President, u Prof. Lakhon Kma da ong u wa ka NEHUTA kyrchaan ko yeini wa leh ka NEHUSU.
Da khana u leh wa dadep ong ki ya u VC wa ymtip ki wot ya ki dkhot ka Selection Committee kiwa da jied ya u Singh kam u Registrar.
Katkam wa ong u Prof. Kma, u VC da pyrchang u pynksan yei jied ya u Registrar u wym tip iyi iyi leh yei kaam du neidaw wa yajan u wa oo, iwa daw pynsih yei pyrtuid ka NEHU.
Discussion about this post