Kiwa sikai ka skurbah North Eastern Hills University (NEHU) wa kiwa lai puræ da mih syndet ki na kamra ka yalang ka 113th Academic Council hadien wa u Registrar ym bien u wow mih na ka yalang wot hawa da dawa ki wow mih noh u.
Yow pyrchah yeini kiwa sikai hapoh ka lama ka NEHUTA wa ki khynroo khyllood wa puræ hapoh ka NEHUSU da mih noh ki wut napoh ka yalang.
U Prof. Lakhon Kma, President ka NEHUTA da beiñ u ya u Vice Chancellor ka NEHU uwa da lai lait ya ki kyndon ka NEHU Act deiwa thung ya u Registrar u wym tip iyi iyi u wym tip leh wow krehkaam.
Da pynbaad u wa u VC uwa wan heini wow chakri du san snem wei daw lai noh u katwa ka NEHU ka daw neh bait ko, wei da ong u leh wa toh u mih noh u na kani ka University chiseindon wei kamjooh u Registrar uwa da thung hi da oo.
U Prof. Kma da ong u wa kam kini ki Vice Chancellor, Registrar, Deputy Registrar ym emkaam ki wow wan chong ha NEHU wei dang lah wow thung ya ki Senior Professor kiwa da pliah wei chemphang.
Discussion about this post