Shillong: Ka dhab montri yong ka sorkar MDA da booh ko ya ki kongsan wow pynhær ya ka lama yong ka ri hapoh ka jylla ha ka sngi lehkamen wa yoh laitlooid ka ri wei ha Shillong ya ka lama yong ka ri daw pynhær da u Montri Rangbah ka jylla, u Conrad K Sangma.
Ya ini da pyntip da u Symbood Montri Rangbah ka jylla, u Prestone Tynsong hawa yaklam wa kiwa pathai khubor ynne ka sngi hadien wa kut ka Cabinet Meeting.
U Prestone da ong u wa neidaw u Conrad man u kam u kyrtong ha ka Election chiteiñ samoi na South Tura, ha ka tai ka sngi da em ki kyndon wow khang ya oo wow klam u khamtam ki kaam pynroi wa ki Scheme sorkar.
“Ym em wow khang ya u Montri Rangbah wow embynta u kam u kongsan ha ka sngi lehkmen laitlooid ka ri tangwa neidaw wa man u kam u kyrtong ka NPP ha ka Election chiteiñ samoi na South Tura, ym ye u wow klam chaphang ki kaam pynroi namo kiwi kiwi ki kaam wa leh bha ka sorkar katkam ki kyndon ka ECI,” da ong u Prestone.
Da pyntip u leh wa ka sorkar da booh ko ya ki Montri wa ki sahep sorkar wow pynhær ya ki lama ha kylleiñ ki District, Sub Division wa ki Administrative Unit.
U Prestone da ong u wa ki Montri da rai ki wow pynhær ya lama wow man ha Shillong wow leh da u Montri Rangbah u Conrad K Sangma, ha Willamnagar da u Symbood Montri Rangbah, u Prestone Tynsong, ha Nongstoiñ da u A L Hek, ha Nongpoh da u Hamletson Dohling, ha Jowai da u Sñiawbhalang Dhar, ha Baghmara da u Kyrmen Shylla, ha Resubelpara da u Samlin Malngiang, ha Ampati da u James K Sangma wa ha Khliehriat da u Banteidor Lyngdoh kiwa man ki Montri ha ka sorkar.
Nalor kini ka sorkar da booh ko leh ya ki Chairman wa ki sahep sorkar neibynta ki Sub-Division wa ki Administrative Unit wow embynta ki kongsan ha ka lehkmen sngi laitlooid ka Ri.
U Prestone da ong u leh wa ha ki thaw wa em ki Election chiteiñ samoi kam ha Tura, Ranikor wa Mawkyrwat ya ki lama ka daw pynhær da ki sahep ka district.
Discussion about this post