I jia wa pynkhrngiat ym kut de i ha India heiwa ha kani ka kynti won u khynnah Class 2 uwa dang 7 snem da cha kñia u ha Hathras District, Uttar Pradesh heiwa da chah pynyap u deiwa chah ksih khnang wow roi u paar ka skur wa lai u.
Ki pulit da pyntip ki wa da em san ngut kiwa emkti ha ini i kaam wa kynthup ya u tre wa u Director kani ka skur wa tip kam ka DL Public School wa le ngut kiwa sikai da chah kem ki.
U tre kani ka skur uwa tip kam kam u Jasodhan Singh uwa ngiat ha i leh jadu ‘Tantrik’ da phah u ya u khon u uwa tip kam u Dinesh Bhagel uwa man kam u Director kani ka skur wow kñia u ya uwi u khynnah yow pawnaam kani ka skur neidaw wa joor duna khynnah ko.
Najrong ini, u tre kani ka skur da chim u leh da ka ram yow sdang ya kani ka Residential School kawa em ha chnong Rasgwan.
Deilang wa u Director kani ka skur da em leh kiwa sikai kani ka skur wa tip kam u Laxman Singh (Principal), u Ramprakash Solanki wa u Veerpal Singh kiwa da emkti wow pynyap ya uni u khynnah ha ka 23 tarik uni u bani.
Ki pulit da pyntip ki wa hadien wa pynman ya ka Post-Mortem da chem wa ya uni u khynnah da pynyap deiwa ksih oo na rdang.
Ha ka sngi wa jia ini, kini ki bru da rahbor ki ya uni u khynnah napoh ka Hostel wa sah u cha iwi i thaw wa langam yow leh ya ini i kaam tangwa uni u khynnah da khyrngiat u wei da sdang u yaam kamtæ da ksih ki oo.
Uni u khynnah toh uwa sah ha ka Hostel kani ka skur heiwa neiliang ki bor sorkar da phah khang ki ya kani ka skur hadien wa jia ini heiwa da chem wa ya kani ka skur da sdang khlem da yoh bor kamjooh ya ka Hostel.
Da chem leh wa chwa ini, da em i pyrchang wow kñia da uwi won u khynnah ha ka 6 tarik uni u bnai tangwa ym em yohlaad ki.
I takit ki pulit da chem leh ya ki tiar ki tar yow leh Puja, ki tylle, ki dur niam na kawi ka kamra wa em hadien ka skur iwa pynyoo wa em i leh jadu namo ka Black Magic.
Discussion about this post