Arngut kiwa yalap niam ka Balang Presbyterian kiwa na ka Balang Presbyterian Laitumkhrah, u Pastor RG Laloo wa u Tbn. Tomlin Nongkhlaw da chah ksoh ki ynne ka sngi ha ki bru yong ka seiñ Bajrang Dal ha Patna, Bihar wei hadien wa chah ksoh ki da e kti noh ya ki ha ki pulit.
Katkam ka khubor wa da yoh, da khana wa kini ki arngut da lai ki cha Bihar wow yalap ya ka Gospel, tangwa da jia noh ini wa jia. Hadien wa da yoh yutip hajrong ini iwa jia, neiliang ki bor pynlai yong ka Balang Presbyterian da pyrchang ki wow yoh yaklam wa kitai ki ar ngut kiwa yalap, tangwa ym ye ki wow batai che iyi wa pynman wow mih itai i jia.
Tangwa katkam ka khubor (Message) lyngba ka WhatsApp wa da yoh na u Pastor Rueben Laloo, da pyntip wa ym em jai iyi iyi leh wa hap wow khuslai, heiwa da khana u leh wa ki waroh arngut daw yoh ki wow liwan noh cha ka jylla ynne hi i janmiet.
Kani ka khubor i chah ksoh kini kiwa yahkhmat niam ka Balang Presbyterian na Shillong da poor smat bha ko ha ki rynsan Social Media.
Da em leh ka khubor wa da ong wa ini da jia i heipor wa kini ki arngut kiwa napoh ka jylla dang duwai Blai ki ha i yung u bru wa tipmit ki ha Patna heiwa da wan kini ki bru ka Bajrang Dal kiwa da pynbaad wa pyrchang ki wow pynkylla niam ya ki bru.
Neiliang u Montri Rangbah ka jylla, u Conrad K Sangma da beiñ u yeini wa jia chah tba kti wei chah leh embor ha ki kattu katni ya kini ki arngut kiwa kreh Balang. Da pyntip u leh wa da phah ya ki pulit ka Meghalaya wow chimkhia ya ini deiwa yaklam wa ki pulit ka Bihar yow ujor FIR pyrchah ya ki bru kiwa leh ya kini ki kaam pyrchah ya ki bru ka jylla.
