Ki le ngut chi payu naka chnong Domjyrti, South West Khasi Hills District da kam ki wa da chah kyntait ha ki bor chnong yong ka chnong Domjyrti, ha i yahkhmat ka VEC wa ha u Dealer wow e khoo rachon wei wow yoh kreh ha ki kaam 100 sngi (NREGA) hapoh chnong du na i daw wa em i kajia thied thaw hapoh chnong.
Neiliang ka Entinoris Nongsiej da pyntip ko wa ka deilang waka payu wa heh ko ka Stera Nongsiej, da chah khang ki wow wan chim ya u khoo rachon na u Dealer wa toh u saam hapoh chnong ha uni u bnai wei hawa ya pyrchang ki wow lai yachem ya u Dealer leh, da ong u wa ym ye wow e neidaw wa chah khang pyrchah ha u Montri wa Secretary chnong.
Neiliang yong ka Prostarlin Nongsiej won da pyntip ko wa kiwa yahkhmat chnong ym em klam che ki ha ka lada u kyntait chnong næ kammon tangwa da klam che ki wa ym ye wow e NOC næ ki kynja Certificate chnong ya ka.
Neiliang yong u Pauldeep Tongwah, President KSU Mawkyrwat Circle da ong u wa ka seiñ ynne ka 25 tarik deilang wa ki manbei da lai ki wow yachem yaka DC ka South West Khasi Hills ka Isawanda Laloo hajrong ini i bynta wow kyntu wa toh u tuklar smat hajrong kani ka kaam. Ha i jooh i por leh da pyntip wa neiliang ka seiñ da pyrchang ko wow yaklam yasñiawthooh wa ka chnong Domjyrti tangwa ym ap ki. Heiyong sakhiat lada em kiwon kiwon ki kaam, toh u pynbait da kawi ka luti wei ym toh wow khanglaad ya kiwon kiwon kiwa chong chnong wow yoh ki yei bynta u khoo rachon, i kreh 100 sngi wa kiwi kiwi ki myntoi wa toh u yoh ki naka sorkar.
Ka seiñ da kyntu ko yaka yung krehkaam ka C&RD Block, ya u Inspector of Supply, ya u Project Director yong ka DRDA wa yaki bor District wa toh u tuklar wei pynchitom leh katkam ka aiñ ya kiwon kiwon kiwa pyrchang wow pyndooh yaki myntoi wa toh u yoh naka sorkar du na kiwon kiwon ki daw wym bait ha chnong ha thaw.
Ini toh katkam ka kyrwoh na u Pauldeep Tongwah, President KSU Mawkyrwat Circle.
