Jowai: Ka chnat Tourism yong ka sorkar jylla da mang ko kamwa T. 10 klur tam yow pynku wei pynbha pynmiat yaki ar tylli ki thaw wa haap haki artylli ki Constituency ka West Jaiñtia Hills District, kawi toh ha chnong Nartiang hei thaw watip kam ka Kpær Moobynna (Nartiang Monolith) wa haka Temple warim tam wa em ha katai ka chnong, iwa ar won toh ha Jowai neibynta ka Aitnar ka thaw wa pyndep yaka Behdeiñkhlam wa chisien chisnem yong ka Raij Jowai.
Ya kani ka Scheme wym slem de da pynkreh yaka wei da pyntikna ynne ka sngi da u Speaker ka Meghalaya Legislative Assembly u Metbah Lyngdoh hawa wan hiar li pait ya kitai ki ar tylli ki thaw ha Nartiang wa ha Jowai, hei synran lang u MLA ka Nartiang Constituency u Sniawbhalang Dhar, u MLA ka Jowai Constituency u Wailadmiki Shylla nalor ki MDC ka JHADC, ki bru ka Seiñ Raij Jowai wa kiwi kiwi.
Hei yaklam wa u Metbah Lyngdoh, da khana u wa kani ka Scheme toh lyngba ka Ministry of Tourism watip kam Pilgrimage Rejuvenation and Spiritual Augmentation Drive (PRASAD).
Khana haroh u wa ya kani ka Scheme toh oo wa tyrwa heipor wa dang man u kam u Minister ka chnat Tourism ka sorkar jylla.
“I wan lai pait lai sylli yong nga ya kini ki thaw ynne ka sngi toh hajrong wa kammon u sdang noh yei pynkreh,” ong u Metbah.
Na kani ka Scheme da mang kamwa T. 6 klur tam yaka Aitnar ha Jowai katwa T. 5 klur tam won ha Nartiang.
Neiliang u Sniawbhalang Dhar da pynsñiaw u yei kmen neibhah ym slem de yei kreh u sdang noh neibynta i myntoi ki paidbah. Heijooh i por e khublei haroh u ya u Speaker wa da chimkhia u neibynta i roi i paar yong ka imlang sahlang.