Ha ka 3 tarik uni u bnai, kawi ka Truck wa em ya u Number ML-10C-4747 wa yah da u Pynwanborlang Kharbani heipor wa lai ko cheiliang Shillong deiwa wan neiliang Laitlyngkot deilang wa kiwa bood Truck, u Md. Dorbseh Ali wa u Md. Mnower, heipor kamwa 2:00 waje i step synyaaw manda poi ha Mylliem hadien wa palat ya ka Solinya Restaurant, da em kawi ka kari khian wa wan nadien wa da sangeh hapyrdi sarok wei da mih 4-5 ngut ki bru kiwa sap Mask wei kiwa rah tari ha kti.
Kini ki bru da maham ki wow ah wow dung ya kiwa em hapoh Truck lada yaleh pyrchah ki wei da kdoh ki yei kti i kjat yong ki deiwa tymmoh leh yei khmat dep te pyndem ki ki hapoh ka Truck hi.
Kiwa chah kdoh da pyntip ki leh wym sñiawthooh ki yei ktien wa klam kini ki bru wei da yah ki ya kani ka Truck cha i thaw wa kwah hi ki. Manda poi hei step kini ki bru da yut noh ki napoh ka Truck, kamtæ hadien wym em de psiah ki chapoh ka Truck, kini ki 3 ngut kiwa da chah kdoh da ye ki wow pynlait ya idæ wei da chem ki wa da em ki ha i thaw chwa wow poi cha Sohryngkham ha u sarok Shillong-Jowai tangwa ka Truck toh kawa kyruiñ cheiliang Shillong.
Hadien wa mih ki cha lait yow pait ya ka kari, da chem ki wa ki 14 tylli ki masi deilang wa ki mooid, ka Transit Challan, ka poisa T. 35,000, ar tylli ki Mobile Phone ym em de ki.
Neiliang kiwa chah lute da e FIR ki ha ka Mawngap Police Station.
