Chah pynbaam ait masi, chah dat wei chah pyndeiñ da ki slipar uwi u Pastor | Ym em wa chah kem

Hadien palat 15 sngi wa chah dat u Pastor Bipin Bihari Naik ha kiwa chongchit niam ha Dhenkanal District ka jylla Odisha, ym em kiwa chah kem hadooh kattæ heiwa kiwa khian paaid ha ka niam da hap ki wow im dei tieñ.

Ini da jia i ya u Pastor Bipin Bihari Naik ha ka 4 tarik uni u bnai ha chnong Parjang heiwa najrong wa chah dat u, da pynbor ya oo wow ong Jai Sree Ram wei wow baam ait masi wei da suba wa da leh yeini da ki dkhot ka Bajrang Dal.

Da pynyuiñ ya uni u Pastor deiwa pynkieñ da ki slipar deiwa kbai paidbah wa pyrchang u wow pynkylla niam.

Uni u Pastor deilang ka kurim u chirup wa kiwi de da pynman ki ya ka yalang duwai Blai ha iwi i yung wa em ha chnong Parjang tangwa da wan ki bru kiwa em kamwa 40 ngut wow kær kut ya ini i yung kiwa da khut ya u Pastor wow mih u cha lait heiwa da jubab u wa daw mih u hadien wa dep u duwai wei heini i por kini ki bru da psiah yabor ki chapoh yung.

Ka kurim uni u Pastor da khana ko wa kini ki bru da sdang ki wow dat ya kiwa emlang hapoh yung wei ka deilang wa ki khon khian ko da yohlaad ki wow yut deiwa phet cha ka Police Station.

Kini ki bru da thooh chynnam ki ya u Pastor heiwa da taan ki oo cha lait deiwa dat wei bom ki oo, heiwa da thaap ki oo khlem sangeh wei da wan leh ki bru kiwa da dat oo da ki dieñ. Da biah ki leh dei sindoor rong soo ha waroh i khmat u wei da pyndieñ ki da ki slipar ha rdang u.

Da taan ki oo yow pynyoo paidbah ha kylleiñ ki luti ka chnong kamwa ar kynta.

Ka kurim u Pastor da ong ko wa ki pulit hadien wa kyrpaad ko ya ki da lai ki hadien ar kynta cha ini i thaw.

Da khana ko leh wa ya u kurim ko da kdoh ha uwi u chrot kawi ka Hanuman Temple wei da pynboor ki oo wow baam ait masi wei da mih snaam bha u. Da pteiñ ki leh wow thaap oo deiwa phah ya oo wow ong Jai Sree Ram.

Hanla poi ki pulit, kini ki bru ym em yut ki na ini i thaw tangwa hawa kut da ye ki pulit wow sai ya u Pastor na ini i thaw.

Related posts

Yoo chyrkhei ki tiar yasiat wa yoh kem na ki 17 ngut kiwa pynleh kam ki dkhot ki seiñ kieñ suloi ha Manipur

October 25, 2026

Mar ya sdang ya ka Jaintia Artist Association yoh yarap Rs.10 lak na ka sorkar

October 25, 2026

Hadien wa booh ujor ka kurim u Pastor, chah e FIR kylla pathan ko ha kini ki bru kiwa da ong wa pynbor ki wow pynkylla niam ya ki bru.

Neiliang u Pastor Bipin Bihari Naik da ong u wa da jied u maap ya kini ki bru wa emkti wow leh kamni ya oo kam wow kynmoo wei burom ya ka lyngkhooh sngi yap u Graham Staines deilang wa ar ngut ki khon u kiwa da chah thang ha u snem 1999 ha jylla Odisha hi.