U Rahul Gandhi uwa man kam u MP ka Wayand Parliamentary Constituency ka jylla Kerala, ynne ka sngi da chah pyndam u wow man kam u MP ka Lok Sabha hadien wa chah rai pynrem u ha ka mukotduma wa da yaleh ha ka yung bichaar u Chief Judicial Magistrate, Surat ka jylla Gujarat.
Ka Lok Sabha Secretariat da pynbna ko ynne ka sngi wa neidaw wa da chah rai pynrem u Rahul Gandhi ha ka 23 tarik uni u bnai, kamtæ hapoh ka Article 102 (1)(e) ka Constitution ka India deilang waka aiñ Representation of the People Act, 1951 da chim ya ka rai wow pyndam noh yei man MP u Rahul Gandhi.
Iwi na ki kyndon wa ye u chah pyndam man MP toh lada chah rai pynrem ha ka yung bichaar heiwa ka yung bichaar da phah kset ko leh ya u Rahul Gandhi ar snem heiyatoh waka mukotduma Defamation Case heiwa u Rahul da chah e mukutduma neidaw wa pynsih u ya i kur “Modi”.
Kani ka mukotduma toh kawa da yaleh nadooh u snem 2019 heiwa u Chief Judicial Magistrate, HH Verma da rai pynrem u ya u Rahul Gandhi.
Ini waroh toh heiyatoh wa i klam yalap Election MP 2019 wa da pynman ha Kolar, Karnataka heiwa u Rahul Gandhi da ong u wa ileh waroh kiwa em yei pyrtuid Modi toh du kiwa tooh suda nadooh u Nirav Modi, u Lalit Modi wa u Narendra Modi le hem u yei pyrtuid Modi.
