Jowai: Haka Election wow jied MLA haka jylla Jharkhand kawa da pyndep niaw Vote ynnin ka sngi, ka BJP da chah pynhiar chuki heiwa hadooh u CM yong ka leh u Raghubar Das da rem u ha u kyrtong samen u Saryu Roy da palat 15,000 Vote.
Ki le Party kiwa da yatoh lok chwa ka Election wa kynthup yaka Jharkhand Mukti Morcha (JMM), Congress waka Rashtriya Janata Dal (RJD) deilang da jop ki 47 tylli ki Constituency na ki 81 tylli heiwa na kini, ka JMM da jop ko 30, Congress 16 waka RJD won ka wi.
Ka BJP ha kani ka kynti da yaleh Election ko samen ha Jharkhand khlem em lok wei da jop ko 25 tylli ki Constituency deiwa emkaam 41 yow yoh u chna sorkar wei da ieh ko leh yaka lok warim yong ka ka All Jharkhand Students Union (AJSU) kawa jop ar tylli ki Constituency.
Ini i rem ka BJP da wan i hadien wa ym ye ko wow chna sorkar ha Maharashtra ini wa dep hadien ka Election wei da dooh ko leh yaka Rajasthan, Madhya Pradesh wa Chhattisgarh cha ka Congress ynnin u snem.
Haka Election MP cha ka Lok Sabha, ka BJP da jop ko 11 na ki 14 tylli ki Constituency ha Jharkhand wei ha u 2014 haka Election MLA ka BJP da jop ko 37 tylli katwa ka AJSU da jop ko 5 tylli heiwa ka Congress da jop ko du 6 tylli donhi.
U Prime Minister ka ri u Narendra Modi hadien wa mih ka Result da e khublei u yaka jylla Jharkhand yaka laad wa da dep e ki wow chakri yaka.
Nadooh wa dep jop suk ka BJP haka Election MP ym pu em won jop ko deiwa boon deiwa suk haki Election wow chna sorkar hapoh ki jylla.
Discussion about this post