Kawi ka manbei Garo da chah pynjæd ki sula wa sap ko ha ka chnong Maikhuli wa em ha khappood ka Ri-Bhoi wa Assam hadien wa da mih i yachoh yadat wa joor bha hapyrdi ki paidbah ka Meghalaya wa ka Assam neidaw wa lai pynhaap ki ya uwi u chrot bordiñ wa da pynyieñ da ka chnat saam bordiñ ka Assam wa tip kam ka Assam State Electricity Board ynne ka sngi.
Ka Assam State Electricity Board da wan ko wow pynyieñ ar tylli ki chrot bordiñ ynne dang step.
Ha ini wa jia neiliang ki bru na ka chnong Maikhuli da mih paidbah ki khrui yow pynhaap ya uwi na kini ki chrot bordiñ heiwa heini da em chwa ki bru kiwa na Assam kiwa da sdang wow thooh daw wei suki suki da mih chwa ka thma ktien kawa joor bha hapyrdi ki paidbah kawa da yah won cha i sdang wow ya tba kti wei da pynbood sa i yachoh para bru hapyrdi u sarok.
Hadien ini, ki pulit na Pilangkata Outpost wa na Khanapara da ye ki wow pyn-jai-jai ya ki paidbah deiwa emlang ki pulit na Assam, kiwa da ye wow pynpra ya ki paidbah na waroh arliang wei najrong kini da wan leh ki bor pynlai District na Meghalaya wa Assam.
Rap hadien kattu katni por da wan kiwa yahkhmat ka FKJGP Byrnihat Circle yow e kyrchaan ya kiwa chong chnong ka Maikhuli.
Manda wiar noh i ya kajia, neiliang ki bor District na Meghalaya wa yahkhmat da u Magistrate wa kiwa na Assam, da rai ki wow thung da ka Peace Committee heiwa waroh arliang u jied ki mar 10 ngut ki dkhot wei ha kani ka Committee daw emlang ki DC yong ka Ri-Bhoi wa na Kamrup khnang yow wanrah yei suk i saaiñ wa i ya maya hapyrdi ki paidbah kiwa sah ha katai ka thaaiñ Maikhuli, kawa man leh kawi na ki thaw khappood hapyrdi ka Meghalaya wa Assam.
Discussion about this post