Ka yung krehkaam ka chnat Divisional Forest Officer (DFO) Jaiñtia Hills (Wildlife Division) ha ka 21 tarik da pynkut ko ya ka tayaaw lehkmen ‘Wildlife Week’ ha ka yalang wa da pynman ha Yungwalieh ka Dorbar Chnong Tpep Pale Jowai.
Ha kani ka sngi pynkut neiliang ka chnat Wildlife da pynkup burom haroh ko da ka ‘Wildlife Samaritan Award’ ya 18 ngut ki bru samen kamjooh 4 tylli ki kynhun kiwa na West Jaiñtia wa na East Jaiñtia Hills District hajrong i embynta yong ki u pynlait im ya ki jait mrad waphær waphær.
Da emlang ha kani ka sngi u S.M. Sahai, Principal Chief Conservator of Forest (Wildlife) kam u kongsan, ka D.V. Lyngdoh, ADC West Jaiñtia Hills District, u P.K. Agrahari, IFS Chief Conservator of Forests (Wildlife), u P. Khade, Assistant Conservator of Forest Jaiñtia Hills Territorial Division, Jowai wa ka N. Laloo, Divisional Forest Officer, Jowai.
U S.M. Sahai hawa klam kam u kongsan da yaroh u ya ka jylla Meghalaya kawa em ya ki chnong ki thaw wa chimkhia u pynneh pynsah ya ki khloo nadooh ki por warim, wei ini da man leh chibynta i pynneh pynsah ya ki mrad khloo wa ki jait wa im ha ka nadooh kiwa khian tam hadooh ki waheh dooh.
Ong u wa ka jylla Meghalaya da man ko leh kawa ar ha ka ri wa em ya ki khloo kiwa da e yada wei sumaar kyrpang, wei ym slem de daw wan nyngkong ko.
Kamtæ kyntu u i ya krehlang yong uwi pa uwi wow em i bahkhlieh neibynta u e yada ya ki khloo ki kjam kamjooh ki mrad, wei ong u leh lada leh iwon iwon wa booh hei maa ya ka rymaw iwa khaddooh toh i maa ya u bru hi.
Chwa kani ka sngi neiliang ka chnat Wildlife da pynman ko leh da ki yakob waphær waphær kam i thoh Essay, Drawing wa Extempore Speech kiwa em yatoh hajrong i emkaam u pynneh pynsah wei e yada ya ki mrad khloo.
Discussion about this post