Jowai: Ka Shangpung Kickboxing Training School deilang wa ka Dorbar Chnong Shangpung Koira ha ka 3 tarik uni u bnai da pdiang burom ko ya u khloor yalehke Kickboxing ka ri India, u Hame Shaniah Suiam uwa da yoh takma ksiar wa rupa ha ka lympung X WAKO World Cup Diamond Kickboxing Championship 2019 ha Nongbah Anapa, Russia.
Ha kani ka janmiet chirup wa ki paidbah ka chnong Shangpung Koira da emlang u Dolloi ka Elaka Shangpung, u Chanki Langbang kam u kongsan, u Waheh Chnong ka Dorbar Chnong Shangpung Koira, u Witting Born Langstang, ki dkhot wa kitkaam ka chnong Shangpung Koira, kiwa chong chnong ka Dorbar Chnong Shangpung Koira, ki lok ki jor wa ki khynnah yalehke Kickboxing ka chnong.
Ka chnong da dap ko dei mynsien wa kmen wa sñiawsarong wa u Hame da rahnaam u ya ka chnong ka thaw, ya ka yung ka sem, ya ka West Jaiñtia Hills District, ka jylla Meghalaya, ya ka ri India wa ka jaitbru waroh kawi.
Ha kani ka yalang da Pynkup Burom leh ya ki 2 ngut kiwa yalehke ka chnong Shangpung kiwa da jop takma Ksiar ha ka yalehke cha baar ri, ha ka Nepal Open International Kickboxing Championship 2019 kawa da man ha Kathmandu, Nepal nadooh 1-4 Naiynru 2019, u Heimonmi Suchiang wa u Pynshrainmiki Rabon.
Discussion about this post