theme-sticky-logo-alt
theme-logo-alt
Advertisement ad1
Advertisement ad1

Chah pynsangeh krehkaam ki Bank Account ka Missionary ka Mother Theresa, kyntait ka sorkar wa emkti

U Vicar General, Archdiocese ka Calcutta, u Fr. Dominic Gomes da pynsñiaw u yei khyrngiat yei chah pynsangeh krehkaam (Frozen Account) ki Bank Account ka Missionaries of Charity Sisters waka Brothers Congregations da ka sorkar India iwa da man kamwa chah lehbeiñ ha ka sngi Christmas khamtam ya kiwa dooh na kiwa dooh.

Da ong u wa najrong ki 22,000 ngut kiwa chaniah wa kiwa yoh myntoi na kini ki MC Sister wa Brother ha kylleiñ ka ri kiwa boon toh kiwa yoh kjut, kiwa chitom ki wym em wa yarap ya ki nadooh kiwa yoh niang thohlieh wa kiwa da chah kyntait ha ka imlang sahlang.

Kani ka Missionaries of Charity toh kawa da seiñ da ka Mother Teresa ha u snem 1950 ha West Bengal kawa da kreh wow chakri ya kiwa dooh wa duk, nadooh wow e thaw thiah thaw dem wa i baam ya ki. Ka Mother Theresa toh kawa da ieh leh ya waroh i yong pyrthai kawa ym em de hadooh wow kreh yow pynmih poisa deiwa kreh bait yow chakri ya ki bru wa dooh hapoh ka ri India, kamtæ hajrong ini, u Fr. Dominic Gomes da ong u ini toh sa chisien da paitkhmat ya ki Christan wa em ha India deiwa ktah ya ki kaam yarap wa da leh ki iwa da ktah leh ya kiwa dooh wa duk kiwa yoh myntoi na kani ka Missionary.

Da beiñ joor yeini iwa leh ka sorkar deiwa ong wa ym em de i sñiaw wa i pyrkhat yei emkaam yarap ki bru.

Neiliang ka West Bengal, Chief Minister ka Mamata Banerjee leh da beiñ ko ya ini wa leh ka sorkar India.

Neiliang ka sorkar India da pynche ko wa ym em pynsangeh yei krehkaam ya ki Bank Account ka Missionary ka Mother Teresa deiwa ong wa kani hi ka Missionary wa thoh cha ka SBI wow phah pyndam yei krehkaam ki Bank Account chipor.

Tangwa da ong wa ha ka 25 tarik uni u bnai ka Home Ministry ym bien de ko wow pynthymme ya ka FCRA License namo ka Foreign Contribution Regulation Act License yow ye ki seiñ wa em ha India wow yoh yarap poisa na baar ri neidaw wa hadien wa pyntip wa em i wym biang i rukom krehkaam katkam ki kyndon kani ka aiñ.

Kani ka FCRA License ka Missionaries of Charity toh kawa im hadooh ka 31-12-21.

Ka Home Ministry da ong ko wa ym em khang namo Freeze ko ya ka Bank Account heiwa ka SBI da pyntip ko cha kani ka Missionary kiwa da phah kylliang wow Freeze ya ka Account yong ki.

Share this:
Previous

I sñiawngooh na kiwa ha yung u (L) Vincent Dkhar

Next

U-19 Cooch Behar Trophy: Haap 14 Wicket ha ka sngi nyngkong hapyrdi ka Meghalaya waka Arunachal