Du hadien kattu katni sngi wa chah pynyap u Dipu Chandra Das ha Mymensingh, Bangladesh, sa uwi u Hindu da chah dat u hadooh wa yap ha Rajbari District ka Bangladesh wei uni uwa dang chah pynyap toh u Amrit Mondal (29 snem) uwa khut siñ kam u Samrat.
Ya u Samrat da dat da bom hadooh wa yap ha Hosaindanga Old Market ka Pangsha Upazila heipor kamwa 11:00 waje i miet ka 24 tarik uni u bnai.
Ka sorkar wa chipor u Muhammad Yunus da beiñ ko yeini wa jia tangwa da ong wym toh iwa jia neidaw wa em i yaphær jaitbru.
Ki pulit da ong ki wa katkam wa chem ka takit ki, ini da jia i ymthoh nei yaphær jaitbru tangwa na ki daw wa dawa poisa wa kiwi ki kaam pyrchah aiñ.
Da ong ki leh wa u Amrit Mondal toh uwi na ki snar leh kaam pyrchah aiñ wei da psiah u deilang ki bru u cha kani ka yaaw dei thmu wow dawa poisa tangwa dapoi chei chah pynyap u ha kti ki paidbah.
Ka sorkar da ban joor ko wa u Mondal toh uwa da chah pynbaad wa emkti ha kiwa boon ki kaam pyrchah aiñ kiwa khor bha.
U Amrit Mondal toh uwa chong chnong ka Hosendanga wa em ha ka thaaiñ Pangsha wei ki pulit da ong ki wa oo toh u khlieh ka “Samrat Bahini” kiwa emkti ha kiwa boon ki kaam pyrchah aiñ nadooh wow dawa poisa, i pyntieñ bru, maham bru wei u Amrit da em u ar tylli ki Case wa da e pyrchah ya oo heiwa kawi toh ka kaam pynyap bru.
Ki khubor na Bangladesh da ong wa ha ka sngi wa jia, u Amrit da chah dat u deilang wa ki bru u kiwa da pyrchang wow dawa poisa na yung uwi u bru.
Ki pulit dapoi ki ha ini i thaw wa jia wei da kit ki ya u Amrit cha Hospital wei da pynbna wa da khlaad noh u heipor 2:00 waje i step ka sngi wa bood.
Kiwa boon kiwa wanlang wa u Amrit da yoh ki wow yut tangwa da yoh ki pulit wow kem ya uwi heiwa da chem ya ki tiar yasiat na oo.
Discussion about this post