Jowai: Katkam wa pyntip ki pulit uwi u bru wa tip kam u Martinu Shylla (40 snem) uwa na Amlarem Lailyngdoh da chah dat u hadooh wa yap ha kani ka 25 tarik heipor kamwa 6:30 i janmiet ha ka thaw sah kiwa kreh ka thaw tylliat moo (Stone Crusher) u Ngaitlang Dhar wa em ha Amtapoh Amlarem.
Ki pulit da pyntip ki wa da suba wa em kamwa 15 ngut ki bru wa dat ya uwa khlaad wei ini da jia i wa hadien u Martinu da lai u cha kani ka thaw sah kini ki bru (Camp) da kawi ka kari kit mar (TATA) kawa wan thooh oo na yung u heipor 6 waje i janmiet.
Hapoh kani ka kari da em sa le ngut ki bru kiwa da lai cha kani ka thaw wei manda poi ki ha kani ka thaw kini ki bru da maham dat ki ya kini kiwa kreh ha kani ka thaw wei da mih ka yachoh heiwa kiwa boon da yoh ki u yut katwa uwi da mynsoo u wei da kit ya oo cha Ialong Civil Hospital.
Kiwa chong chnong ka Lailyngdoh Amlarem won da yoh kem ki ya kani ka jooh ka kari kawa da yah da uwi tawon u bru heipor wa mut ki u yut na Amlarem wei hadien ini da lai ki cha ini i thaw wa jia wei da chem ki ya u Martinu wa da ym em yong bru de u wei da kit ya oo cha Rangsoli Nursing Home tangwa da khlaad chwa u poi u ha ini i thaw.
Ki paidbah da kem ki ya 11 ngut ki bru najan Syiem Jingsuk Church Amlarem wa kynthup ya 4 ngut kiwa dang hapoh 18 snem heipor wa mut ki u yut da ka kari.
Kiwa chah kem toh u Synshar Mynsong na Puriang, u Rajesh Uriya, u Subash Uriya, u Jun Malakar, u Rinku Uriya, u Abra Uriya, u Santo Uriya waroh kiwa na Katolichora Hailakandi Assam.
Katwa ya ki 4 ngut kiwa dang hapoh 18 snem da phah ya ki cha Observation Home wa em ha Shillong.
Ki pulit dang pynman ki ya ka takit wei da pyntip ki leh wa da em chwa ka kajia chwa ini hadooh wa jia ini waroh.
Discussion about this post