Shillong: Kam chibynta wow pynjoor yei dawa u pynkrehkaam ya ka Inner Line Permit (ILP) wa ki 14 tylli ki phang dawa, ka seiñ Hynniewtrep Youth Council (HYC) ynne ka sngi da pynman ko da ka yakhih wa jai-jai deiwa sdang ya ka chah thngan wa le sngi ha pchem ka Additional Secretariat, Shillong.
Tangwa ki dkhot ka HYC kiwa em kamwa 30 ngut da chah rah noh ki ha ki pulit hadien wa ka bor District, East Khasi Hills da e laad ya ki wow chong hadooh 4 waje i janmiet.
Hadien wa ki dkhot ka HYC ymbien ki u yapra na kani ka thaw, ki pulit da wanrah noh ki da ka bos wow kit ya ki bak bak. Ya kini ki dkhot ka HYC da kyrriah donhi ya ki na kani ka thaw khlem da pynngat kyndon aiñ.
Chwa ini hei sngi, ka seiñ da pynman ko ya ka yalang wow kynmoo warom ya u President warim ka Khasi Students Union (KSU) u Bull N Lyngdoh deiwa booh syntu ha u mot yong oo wa em ha Dhanketi.
Hadien wa pynman ya kynmoo warom, ki dkhot ka HYC kiwa da em da ki spah ngut da lai kjat ki na Dhankheti chadooh Additional Secretariat wow pynman ya ka chah thngan.
Kiwa yahkhmat ka HYC wa kynthup ki ya u Peter J Lawai u President wa u Robert June Kharjahrin u General Secretary da beiñ joor ki ya ka sorkar jylla wa yahkhmat ka Congress khamtam ya u Montri Rangbah ka jylla u Dr. Mukul Sangma neidaw wym ye ki u wanrah ya ki aiñ wow yada ya ki tre jylla nei wan psiah ki bru wa na baar.
U General Secretary ka HYC da dawa u wa lada u Dr. Mukul ym kwah u wow yaklam hajrong ka ILP, toh u yaklam chaphang kiwi ki phang dawa ka seiñ kiwa 14 tylli.
Chooh chooh da ong u wa ka seiñ u yalap pyrchah ko ha ka Election ya kitu ki party ki wym kynthup ya ki phang dawa ka seiñ ha ka Election Manifesto yong ki. Da pyntip u leh wa da pynkhreh hadooh palat 30 tylli ki phang kylli wa ki MLA kiwa em ha ka liang synchaar wa haap jubab ki.
Heijooh i por, u Peter J Lawai da ong u wa ka seiñ u chong chah thngan bait kamwa da rai hadooh 3 sngi lynter.
Da ong u leh wa ym em man ko kawa pyrchah ya ka aiñ wow yada ya ka jaitbru wei ka seiñ u yieñ ko neibynta wow yada ya ka hok ki tre chnong hajrong ki khyndaw ki chyiap, ka kamai kajih, ka hok synchaar khadar wa kiwi kiwi.
Da ong u wa ka Resident and Security Act wa da chna da ka sorkar pynsuk ko ya ki dkhar wow wan psiah ki cha ki chnong ki thaw ka jylla katwa ngait ki.
Hajrong i chah rah ki dkhot ka HYC na ka thaw chah thngan ki, u Superintendent of Police ka East Khasi Hills, u Davis NR Marak da ong wa da rah ya ki yow lait u ktah ya ka chong suk wei ym e laad ya ki u chong yakhih ki mynstep ka sngi neibhah toh ka sngi sdang ya ka dorbar tlang.
Da e laad ya ki dkhot ka HYC wow chong chah thngan ko ha ka 9 tarik won.
Discussion about this post