Ka Naga Peoples’ Union Imphal (NPUI) da beiñ joor ko yei chah rahbor wei chah tba kti ki kynthai Naga heiwa kini ki bru wa rah suloi da dawa poisa ki leh iwa da jia ha ka 12 tarik uni u bnai.
Nyngkong da em soo ngut ki kynthai Naga kiwa em ha Manipur kiwa da chah rahbor na Chandel wa kynthup ya ar ngut ki jaitbru Anal wa mar kawi naka jaitbru Lamkang wa Aimol kiwa kreh ha kawi ka Beauty Parlour wa em ha Khongnang Ani Karak hajan ka India Bazaar, Imphal.
Kini ki soo ngut da chah rahbor ki heipor pyrdi sngi ha ki bru kiwa da dawa Rs 3-4 lak, da ong ka seiñ NPUI haka kyrwoh wa da phah da u President, u M Ngaranmi wa u Secretary Administration, u Daniel Leivon Lamkang.
Kani ka seiñ da ong ko wa ka tre kani ka Beauty Parlour toh ka jaitbru Anal wei da em ko 3 ngut kiwa kreh kiwa da chah rahbor napoh kani ka thaw kreh ki da 10-12 ngut ki bru wa rah suloi kiwa da wan da ar tylli ki kari wei da kit ki ki cha Sawombung wa Sekta wei da maham ki wow pynyap ki lada ym su yaka poisa.
Tangwa kini ki soo ngut ki kynthai da pynlait ya ki heipor kamwa 6:00 waje i janmiet kani hi ka jooh ka sngi hadien wa em ki lok ki kiwa na Manipur kiwa da yaklam ki wa ki heh kini ki bru wa kieñ suloi. Ka NPUI da ong ko leh wa ka kynthai Aimol da chah dat ko hadooh wa da jngem wei kattæ kani dang chah sumaar ko.
Kani ka seiñ da ong ko leh wa wot hadien wa da pynlait ya kini ki kynthai, kini ki bru wa rahbor ki da pteiñ ki wow Phone yow dawa poisa wei da phah su ki hapoh 2-3 sngi lym kamtæ daw wan ki cha Parlour ki yow pynyap ki wei deiwa tieñ yeini da hap ki wow khang ya kani ka dukan ki.
Ha kani ka jooh ka sngi da em sa 7 ngut ki kynthai Naga kiwa chah rahbor kiwa na ka jaitbru Tangkhul, Maring, Mao wa Kabui wei kini leh toh kiwa kreh ha ka Beauty Parlour wa em ha Chingmeirong hajan ka Vishal Mall, Imphal heiwa da pynbaad wa kini leh da chah rahbor ki ha ki bru wa kieñ suloi heipor kamwa 12:30 pyrdi sngi hadooh 4:30 i janmiet yow dawa poisa na ki, da ong ka NPUI.
Chooh chooh da pyntip wa kini kiwa kieñ suloi toh 3 ngut ki kyntai wa 5 ngut ki chynrang kiwa da wan cha ka Parlour wei da sai Pistol ki neitæ da chim ki ya ki Mobile Phone wa ki Aadhaar Card kini ki kynthai kamjooh yong ka tre wei da chondur, riñ Video ki ki wei paan ki leh yei Mobile Number yong ki.
Kini ki bru da dawa poisa ki Rs. 5 lak wei da chim ki leh Rs. 2 lak na ki.
Hadien ini da kit ya ki da ka kari Maruti Gypsy chapoh iwi i khloo wa em ha Sekta ka Imphal East District wei da dat da bom ya ki deiwa pynemkaam dei tdong suloi, ki dieñ wei da maham leh wow siat ki ha kjat wei wow pynyap ki.
Discussion about this post