Shillong: Ynnin ka miet heipor kamwa 11 duna uwi u bru da chah siat u ha ka dong Lummarboh kawa haap hapoh Rynjah Police Station, ya uwa chah siat da tip kam u Pynskhemborlang Kharmawlong (24 snem) uwa kreh kam uwa chna kari, uwa sah ha ka chnong Nongrah wei da mynsoo joor u na ki bynta yong ka kti wei katni dang em u hei chah sumaar hapoh ka NEIGRIHMS.
Hawa yaklam wa u Superintendent of Police (City) u Steve Rynjah da pyntip u wa katkam ka takit na ki bru kiwa sakhi yeiwa jia, ynnin i miet da em ka khajia hapyrdi ki ar liang ki bru ha ka chnong Lummarboh wei u Pynskhemborlang toh uwa jooh lai luti na kani ka thaw wa mih kani ka kajia ha katai ka miet wei hawa yoo u ya ini i kajia neiliang yong oo da lai u wow pynkhlaad tangwa syndet syndet da em wa sai ya ka Pistol kiwa da siat wei da toh u na kti.
U SP da pyntip u leh wa na ka tai ka thaw wa jia da chem ya ar tylli ki tadong kuli ka yong ka Pistol 9 mm, tangwa u SP da kyntait wa emkti ki seiñ kieñ suloi neibhah ka ya kajia toh hapyrdi ki arliang ki bru paidbah. Da ong u leh wa ki pulit dang pynman ki ya ka takit hajrong ini i jia wei da sdang chem leh ya ki kattu katni ngut kiwa suba wa emkti ha ini i kaam.
Neiliang ka bei uwa chah siat da pyntip ko wa da yoh yutip ya ini wa jia hadien wa ki kattu katni ngut ki bru da pyntip ki wa chah siat u khon ko ha Lapalang wei da pynkit ya oo cha thaw sumaar.
Da pyntip ko leh wa u khon ko kattæ da lait u nei maa neibhah da mynsoo u neibynta ka kti u.
Discussion about this post