I awri ha khappood ka India-Bangladesh jia i dei langær khamtam hapyrdi kiwa khayi mar tooh wa ki chipai Border Security Force (BSF) heiwa ynne i step won ha Matiari Border Outpost (BOP) wa em hapoh ka Krishnaganj Police Station ka Nadia District, West Bengal, uwi u Bangladeshi da chah siat yap u.
Neiliang ki BSF da ong ki wa ki lok uni u bru da yut noh ki cha Bangladesh hadien wa chah siat u.
Hawa kynreh ya i thaw wa em uni u Bangladeshi da chem ya 96 klong i dawai kyoh Fencidil Cough Syrup, ar klong i kiad pharæng, ki tiar ah naar wa ki wait wei ya i metyap uni u bru da e kti noh cha ki pulit ka Krishnaganj.
Ini waroh da jia i heipor wa ki chipai ka BSF na ka 32 Battalion da yoo ki ya 6-7 ngut ki nong India kiwa khayi tooh wa rah ya ki yusong Plastic hakhap naar-chieh wei ya kini ki yusong da noh cha chiliang ki naar-chieh heiwa da em ki nong Bangladesh kiwa da yang chwa.
Neiliang ki chipai BSF da maham ki ya kini ki bru waroh ar liang wei da siat ki chi kuli cha suiñ tangwa ki Bangladeshi da tia ki cha ki chipai wa ki wait ha kti wei heitæ ki chipai ym tanar de da hap siat ki chi kuli heiwa da toh uwi u Bangladeshi uwa da yap noh katwa ki lok u da yut noh ki na ini i thaw.
Discussion about this post