5 ngut ki chipai ka Assam Rifle wa kynthup ya u Commanding Officer ka 46 AR, uwa tip kam u Viplav Tripathi deilang wa ka kurim yong oo wa u khon yong ki uwa dang 9 snem da chah siat ya ki ynne i step wa kynthup leh soo ngut dkhot chipai ka Quick Reaction Team (QRT).
5 ngut kiwi da mynsoo joor ki katwa 3 ngut won da mynsoo ki malu mala hadien wa chah siat ki ha ki bru ki wym pu em wan chakhmat wow chim yei kitkhlieh ya ini wa jia heipor 10:00 waje i step ha Singhat Sub-division, Churachandpur District ka Manipur.
Neiliang u Chief Minister ka Manipur, u N Biren Singh da beiñ joor u ya ini wa jia deiwa ong wym ieh jem ya kiwa emkti deiwa ong leh ki bor ka jylla kamjooh ki chipai da sdang ki wow thooh ya kini kiwa emkti.
U Chief Minister da lai u leh cha ka Shija Hospital, Imphal yow lai pait ya ki chipai wa mynsoo ha ini i jia.
U Governor ka Manipur, u La Gensan leh da beiñ u ya ini wa jia deiwa phah leh ya ka khubor sñiawlem cha ki manyung wa em kiwa khlaad.
Neiliang u Union Defence Minister, u Rajnath Singh leh da ong u wa ka ri emlang ko wa ki chipai wa da dooh yei mynsien kamjooh ya kiwa hayung u CO ka 46 AR deiwa kular wow pynchitom ya kiwa emkti.
U Montri Rangbahdooh ka ri, u Narendra Modi leh da beiñ u ya ini wa jia deiwa ong wa ym myllieñ de ya kiwa da khlaad deiwa phah leh ya ki kyntien pyntngen cha kiwa hayung kiwa khlaad.
Ini i thaw wa jia toh iwa em hajan u pood ka India wa Myanmar.
