theme-sticky-logo-alt
theme-logo-alt
Advertisement ad1
Advertisement ad1

Chah kem arngut ki kynthai deilang wa 12.9 Kg i Heroin ha IGI Airport

Advertisement ad1
Advertisement ad1

Ki bru ka Custom ha IGI Airport, New Delhi da yoh ki wow kem ya 12.9 Kg i Heroin na arngut ki nong Uganda kiwa wan na Nairobi (Kenya) lyngba ka Abu Dhabi hei miet ka 12 tarik uni u bnai. Ini i drug toh iwa chongdor T. 90 klur.

Kini kiwa khayi drugs da yoh ki wow lai suk na Uganda, Kenya chwa wow chah kem ki ha India deiwa murieh yei drugs hapoh ka synduk (Checkin Luggage) thap that ki kawa da chna kyrpang yei tre wa hoi u looid.

Advertisement ad1

Ya ini i drugs da chem hadien wa wan s’u da ki ksaw ka Indian Customs kiwa em ha Delhi Airport wei hadien wa kynreh ya ki synduk yong ki wei hadien wa takit, kawi ka kynthai da phla ko wa rah Heroin ko hapoh ka synduk yong ka ha ki thaw wa da chna kyrpang ha waroh arliang.

Kani ka bru da phla ko leh wa da pyntipmit ya ka wa uwi u nong Kenya uwa da kular wow su poisa ya ka lada rah wei lai e ko ya ini i mar cha ki bru wa em ha Delhi. Kamtæ kani ka bru da lai ko cha Nairobi na Kampala da ka kari heiwa uni u bru da ekti ya ka ya ka muna wow kit ko cha Delhi deiwa e ya ka leh ya ka ki Ticket wa ki kot ki sla wa toh lai phah sumaar ko (Medical Tourist). Kani ka bru da toh wow e ko yei mar ha u bru uwa yang ya ka pyn ha lait ka Airport. Na kani da yoh wow kem 5.4 Kg i Heroin.

Na kawi won ka kynthai kawa wan lang da ka jooh ka lieñsuiñ kawa emlang wa ka ar tylli ki synduk kawa murieh hei jooh i rukom ya 7.5 Kg i Heroin. Hawa takit ya kani won da pyntip ko wa da phah ya ka da ka payu ko na Kampala cha Nairobi da ka kari wei da hær won ko cha Delhi lyngba ka Abu Dhabi da ka lieñsuiñ wei kani leh da em ko ki jooh ki kot ki sla wa lai phah sumaar ko.

Ini i yoh kem drugs toh hadien wa dep wow yoh kem 3 Kg i Heroin na u nong Kenya uwa da poi hei miet ka 28-10-21 na Nairobi deiwa lai lyngba ka Sharjah. Ha chwa ini leh ha ka 23-04-2021, arngut ki nong India kiwa wan na Uganda da chah kem ki wa 2 Kg i Heroin wei hadien wa takit yeini da yoh wow kem sa ya le ngut ki bru kiwa na Uganda.

Ha uni u snem, ki Delhi Custom da yoh ki wow kem palat 100 Kg i Heroin wei da kem ya palat 26 ngut ki bru. Ha u Naikhynde uni u snem da yoh wow kem 3000 Kg i Heroin na Mundra Port.

Share this:
Previous

Chah siat yap u CO ka Assam Rifles deilang waka kurim wa u khon ha Manipur

Next

Pynhaap pyrda ka KSU Narpuh ya ka lympung yaleh Badminton ha Lumshnong