U MLA kamjooh u MP warim ka Uttar Pradesh, u Atiq Ahmed deilang wa u payu u, u Ashraf Ahmed da chah siat yap ki heipor wa dang yaklam ki wa kiwa thoh khubor ha Allahabad iwa tip kam ka Prayagraj katni wei ini da jia i ynnin i miet heipor wa dang sai ya kini ki arngut ki chi payu na patok deiwa synraan ki pulit yow lai yah leh ya ka Medical Check-up.
Kiwa emkti wow siat ya kini ki chi payu kiwa em le ngut da pyndem ki ha ki pulit pyn ha ini i thaw khlem da yaleh pyrchah deiwa ong ya ki kyntien “Jai Shri Ram”.
Kini ki le ngut da yoh ki wow poi chajan hadooh wow sait ya kini ki arngut deiwa leh kam kiwa thoh khubor heiwa ya u Atiq Ahmed da siat nyngkong na khlieh wei wut-wut heijooh i por da hær boon kuli deiwa chah siat lang leh u diah u Atiq Ahmed heiwa waroh ar da toh ki boon kuli.
Ha kani hi ka tayaw, u khon u Atiq dang dep chah siat wot u ha ki pulit wei hawa kylli kiwa thoh khubor yei daw wym em lai tlep u ya u khon, da jubab u wym em wa lai yah ki.
U Atiq da dep man u kam u MLA la san sien nadooh u 1989 hadooh u 2004 na Allahabad West kam u kyrtong samen le sien wei mar chisien kam u kyrtong ka Samajawdi Party wa ka Apna Dal, wei na u 2004 hadooh 2009 da man u kam u MP ka Lok Sabha na Phulpur Constituency kam u kyrtong ka Samajwadi Party. Ka Phulpur Constituency toh ka Constituency wa jop u Prime Minister wa nyngkong dooh ka India, u Jawaharlal Nehru.
Tangwa u Atiq Ahmed toh uwa da em da ki spah tylli ki mukotduma pyrchah ya oo wa emkti u ha ki kaam rahbor ya ki bru, ki kaam tynyap bru, ki kaam dawa poisa, ki kaam maham bru wei da yaleh Election u leh boonsien napoh patok. Da yoh u wow yaleh Election neidaw wym em chah rai pynrem u ha ka yung bichaar ha kitu ki por.
U khon u Atiq u Ahmed, u Asad toh uwa da thooh ki pulit wa emkti u ha i chah tynyap u Umesh Pal heiwa ha kani hi ka tayaw da chah siat u ha ki pulit ka UP. U Umesh Pal man u kam uwi na kiwa sakhi yei chah tynyap u Raju Pal ha u snem 2005 heiwa ya u Raju da suba wa emkti u Atiq wow tynyap.
U Atiq Ahmed won toh uwa da chah pynbaad wa emkti u wow tynyap bru hei sien wa nyngkong nadooh u snem 1979 heipor wa em u dang 17 snem tangwa ha ki snem wa wan da man u u bru wa embor bha ha ka thaaiñ sepsngi ka Allahabad heiwa ha u snem 1989 da ye u wow jop syndon ya ka Election MLA.
Nadooh u 2009 won da rem u ha waroh ki Election wa da yaleh wei hadooh ynnin da kset ya oo nadooh u 2019 heiyatoh wa ki kaam rahbor ya ki bru.
