Ki pulit ka West Garo Hills da yoh ki wow pynlait ya uwa chah rahbor deiwa sait yap ya uwi na kiwa rahbor wei da yoh kem ya ar ngut won wei yeini da ye u leh du hapoh 24 kynta nadooh wa chah rahbor.
Uni uwa chah rahbor toh uwa kreh kam uwa khayi masi, wei yeini wa jia da pyntip cha ki pulit da u khon u uwa sah ha chnong Bangalkata wa em ha Phulbari wa u pa u u Ruvi Hussain da chah rahbor u ha ka 20 tarik heipor wa dang kit masi u hajan ka Dananggre Songma Reserve Forest heiwa da em le ngut ki bru wa rah tiar yasiat da rahbor ki oo.
Kamtæ ki puit ka West Garo Hills District Police, ki SF-10 Commando wa ki pulit na Dadenggre wa Damal Asim da lai thooh ki ya uni uwa chah rah wei hei step ka 21 tarik da chem ya kini ki bru wa rahbor na Dipogre Asim Chiring wa dang haap hapoh ka Damal Asim.
Manda poi ha ini i thaw rieh kini ki bru, da sdang ki wow siat ya ki pulit heiwa ki pulit leh da siat kylla ki wei da yoh leh wow kem ya ar ngut kini kiwa rahbor deiwa yoh leh wow pynlait ya u Ruvi Hussain.
Ha ini i yasiat, uwi na kiwa rahbor wa tip kam u Raksan M Marak da toh kuli u na kpoh wei da kit ya oo deilang uwa chah rahbor cha Dadenggre yow chah sumaar katwa ya u Raksan da kit won cha Tura Civil Hospital tangwa da khlaad noh u chwa u poi ha kani ka thaw sumaar.
Ki pulit da chem ki na ini i thaw wa jia ya kawi ka suloi Shotgun kawa chna hi (Country Made) deilang kawi ka tari.
Ki ar ngut kiwa da yoh u kem toh kiwa tip kam u Chingsan M Marak wa u Sengchuang M Sangma uwa khut siñ kam u Miksong. U Sengchuang toh uwa jooh man kam u dkhot ka seiñ keiñ suloi wa tip kam ka ASAK kawa da wiar noh wei da lait jamin u na Tura Jail dang hapoh chi bnai hadien wa chah kset u ar snem.
Discussion about this post