Shillong: Ha ka miet ka sngi Bibar kawa ynnin ka sngi, le tylli ki truck wa pynieñ ha pchem yong ka kudam ka Food Corporation of India (FCI) kawa em ha Mawlai Nongmali, Shillong da kop diñ ki hadien wa chah kawang Petrol Bomb ki ha ki bru wa ym tipmit.
Ini da jia i hadien wa chah dat uwi u pulit Home Guard wa chong wa sah ha Mawlai Mawroh uwa sonteri ya ka FCI kawa em ha Khanapara uwa da khlaad noh na i mynsoo joor u wei da suba wa em wa pynhiar tput deiwa thang ya ki truck wa em ha FCI Mawlai Nongmali, Shillong.
Katkam ka yutip wa da yoh, kini ki truk kiwa chah thang toh kiwa em ya u number AS 01 DC 6297, AS 01 CG 9187 wa sa kawi kawa kop diñ malum mala.
Ka Superintendent of Police yong ka East Khasi Hills, ka Claudia A Lyngwa da pyntip ko wa ini da jia i heipor kamwa 12 duna chiteiñ synyaw wei ym em wa mynsoo ha i jia tangwa da iñ boon churia u khoo wa em hapoh kini ki truck.
Ka SP da pyntip ko wa hadien i jia ya u Home Guard ha Khanapara, neiliang ki pulit da chimkhia ki yow lait u mih kiwon kiwon ki jia wow ktah ya ka suk ka saiñ, wei neiliang ki pulit da phah ki wow pynhiar lut ya ki mar waroh heipor sngi tangwa em ki truck wa ym em leh ya ini. Da pyntip ko leh wa ki pulit da yang ki ya kani ka thaw tangwa da suba wa ki damok da lai ki na kawi ka luti na khloo kawa em cha kylla ka kudam FCI.
Hajrong ini i jia, neiliang u montri ka chnat kaam pohyung, da ong u wa ka sorkar ka dang takit ko wow chemdien ya kiwa emkti ha kani ka kaam. Da ong u leh wa hadooh katni ym pu ye u ong iyi iyi leh yei thmu kiwa emkti ha kani ka jia wei daw ye u tip du hadien wa pyndep ya ka takit.
Discussion about this post