Shillong: Ka National People’s Party (NPP) da ong ko wa lada ka National Democratic Alliance (NDA) ym yoh de ko wow synchaar hadien ka Election MP ha Delhi, neiliang ka NPP daw chong noh ko ha ka liang pyrchah.
Yeini da ong da u President ka NPP Meghalaya, u Dr. WR Kharlukhi deiwa kam wa ka National Democratic Alliance (NDA) wa yahkhmat da ka Bharatiya Janata Party (BJP) daw synchaar biang ko ya ka ri India hadien ka Election.
Ha iwi i liang u President ka NPP u da ong u wa i lai u Montri Rangbah ka Meghalaya, u Conrad K Sangma cha Varanasi wow synraan ya u Montri Rangbahdooh, u Narendra Modi heipor wa thap pyrtuid u toh wa ka NPP man ko chibynta ha ka NDA wei man ko ka dak kawa yatylli.
“I man i ka dhab synrop ha ka sorkar NDA wei yeini da klam che nadooh wa sdang, neiyi i daw won wa ka Congress kwah ko wow pynbaad wa man i ki suri sap snieh langbrot,” da ong u Dr. Kharlukhi hawa kynthah ya ka Congress.
“I man i ka bynta ka National Democratic Alliance (NDA) neibhah ka BJP ym em de wanrah ko ya ka Citizenship Amendment Bill (CAB) 2016 ha Rajya Sabha,” da ong u Dr Kharlukhi.
Heijooh i por da pynrap u wa lada ka BJP wanrah ko ya ka CAB, ka NPP daw yieñ ko wow yakhun pyrchah bait neibhah wa yieñ ko neibynta ki paidbah ka thaaiñ mihsngi.
Da ong u wa ha ka 29 Duyatra (Jan) 2019, ka yalang yong waroh ki seiñ na ka thaaiñ wa man ha Guwahati hapoh i yahkhmat u Conrad K Sangma da rai ki wow pyrchah ya ka CAB wei ha ka 9 Thohlakhmi (Feb), ka yalang bah ka NPP leh da chim ya ka rai wa lada pynman aiñ ya ka CAB, ka NPP u mih noh ko na ka NDA.
“Neidaw wa ka BJP ym em pynman aiñ ko ya ka CAB ha Rajya Sabha, ka NPP da rai ko wow pteiñ u em wa ka NDA,” da pynrap biang uni u heh ka NPP.
Discussion about this post