Jowai: Ynne i step synyaaw heipor kamwa 2:00 waje kawi ka kari Media Van wa em ya u No. Ml 01 1613 yong ka chnat Directorate of Information & Public Relations (DIPR) West Jaiñtia Hills da chah thang ko ha ki damok ki wym tipmit.
Katkam ka yutip wa da yoh da ong wa hadien wa mih i tdem napoh kani ka kari ya kawa da pynyieñ ha pchem kani ka yung krehkaam kiwa yang (Chowkidar) ya kani ka yung krehkaam da mih ki wei da yaleh ki wow tympleh ya ini i diñ deiwa theh da ka um.
Da antaad wa i lut ha ini i diñ da kynjoh i kamwa palat T. 30,000.
Kani ka kari toh kawa pynemkaam wow lai e wyrta hajrong ki scheme sorkar wa kiwi kiwi ki jait wyrta wa e ka sorkar neibynta ki paidbah.
Heiyatoh wa ini, neiliang ki pulit da register ki ya ka case wei dang thooh ki ya kini ki damok kiwa emkti ha ini i kaam.
Discussion about this post