Tura: Ynnin i miet yong ka 6 tarik ki paidbah da thang ki ya ka Police Station wa em ha Resubelpara North Garo Hills.
Ini da jia i hadien wa ki pulit da siat ki ya ka wi ka kari ha i checkpoint wa em ha Kaldang heiwa da mynsoo 3 ngut ki bru.
Ki pulit ong ki wa da siat ki ya kani ka kari neidaw wym sangeh ki heipor wa phah sangeh ya ka. Da ong leh wa da pynjoor bha ki ya i sylli ya ki kari neibhah boon ki dkhot ki seiñ kieñ suloi wa lai luti dei miet.
Ki paidbah hadien wa yoh ki ya ka khubor wa siat ki pulit khlem daw da lai li thang ki ya ka Police Station wa em ha ha Resubelpara wei da thang ki ya ki kari wa ki truck pulit, ka truck tympleh diñ wa kiwi kiwi.
Ki pulit da ye ki u wanrah yei suk ha pyrdi ki paidbah pyn ha ka tai ka miet hi.
U MLA kani ka thaiñ u Nihim D. Shira da booh u da ka Zero Hour Notice hapoh Assembly hei yatoh wa ini wei da dawa yow pynman ya ka Judicial inquiry, u su bai sumaar cha kiwa mynsoo wei ya ki pulit wa emkti u pynchitom ya ki katkam ka aiñ.
Ya ki le ngut kiwa mynsoo da kit ya ki cha Guwahati yow yoh ya i sumaar wa biang.
Ynne i step ki paidbah da mih ki kam ka dak wow pynyoo yei pyrchah yei leh ki pulit.
Discussion about this post