Palat chispah ngut ki Rohingya wa ki Chin kiwa phetwiar namo ki Refugees na Myanmar kiwa chah kset ha ka Transit Camp ha Goalpara, Assam da sdang ki yei chah thngan iwa khlem booh por nadooh ka 9 tarik uni u bnai wow pyrchah yei chah kset ki.
Neiliang u Additional Chief Secretary (Home), u Ajay Tewary da ong u wa u Inspector General of Prisons wa u Home Secretary da lai ki cha ini i thaw wow yaklam pynbait wa kini kiwa chah thngan.
Waroh da em 103 ngut ki Rohingya wa ki Chin kiwa na Myanmar wa kynthup ya ki kynthai wa ki khynnah da chah kset ki ha kani ka Camp hadien wa psiah tooh ki chapoh ka ri.
Katkam wa ong ka Rohingya Human Rights Initiative da em 7,70,000 ngut ki Rohingya kiwa da yut na Myanmar ha u snem 2017 wei da poi ki cha ki ri wa em cha jan deilang ka India.
Na kini kiwa chah thngan da em 10 ngut kiwa da chah rah cha Hospital ha ka 12 tarik.
Kini kiwa chah thngan da dawa ki leh wow e kti noh ya ki cha ka United Nations High Commissioner for Refugees (UNHCR) ha New Delhi wei wow kyrriah ya ki cha nongbah New Delhi yow kyrriah won ya ki cha kiwi ki ri.
Ha u Naiynñiaw kamwa 35 ngut kiwa em ha kani ka Camp da thoh ki cha ki bor District wow kyrriah noh ya ki na kani ka Camp.
Kani ka Camp kawa em ha Matia, Goalpara toh kawa heh dooh ha ka ri wei da sdang krehkaam ko nadooh u Duyatra (Jan) 2023.
Discussion about this post