Kawi kawa chong chnong ka Shillong da ujor ko ha ki pulit wa ha ka 14 tarik u Naikhynde heipor kamwa 7:00 waje i miet da wai ko ya kawi ka Link Advertisement wa thoh ‘Work From Home’ wa yoo ko ha Instagram wei mar ya leh yeini da yoh ko da u Link wow pynemkaam Telegram iwa da leh ko.
Hadien wa leh yeini da phah ya ka wow yaklam (Chat) ko wa kiwa boon ki bru ha Telegram heiwa da kular wa lada su ko Rs. 1,000 daw yoh ko ar chah i nong hapoh chi sngi kamtæ da su ko hadooh Rs. 94,000 tangwa ym em yoh ko ya ka poisa wa da kular cha ka wei manda paan ko leh ym em de yoh ko ya ka poisa ko.
Uwi won u chynrang uwa na Shillong hi da ujor u ha ki pulit wa uwi u lok u uwa yajan bha wa oo da pynyoo u ya oo wow pynemkaam ya ka Online E-commerce Platform ‘QNET’ deiwa pynchlur ya oo wow pynlut Rs. 5 lak wei yow man leh kam u ‘Business Partner’ deiwa kular wow yoh nong deiwa boon bha heiwa da bien u wow leh yeini hei pyrtuid ka kurim u deiwa e lang ya ka PAN wa Aadhaar Number wei da phah ya ka poisa cha u bru wa tip kam u Sushant Mandal uwa man kam uwi na ki heh. Tangwa hadien wa chong yachemlang lyngba ka ZOOM wa kiwi de ki heh kam u Satish Kumar Chauhan, da sñiawthooh wa i kaam wa leh ki toh u chukor bru heiwa uwa ujor leh da sñiawthooh u wa da chah thok u ha kini ki bru.
Kawi won ka kynthai kawa sah ha Shillong hi, da ujor ko wa em wa pynpoor ya kawi ka Sbirewardz.app hapoh ka WhatsApp Group ka chnong wa sah ko wei hadien wa Download ko ya kani ka App da chem ko wa em wa sai Rs. 10,198 na ka Bank Account yong ka.
Sa kawi won kawa sah ha Shillong da ujor ko wa ka diah ko da ya tipmit ko wa kawi ka bru wa tip kam ka Tripathi Diwarka ha Facebook heiwa da pynbiej ko ka wow phah ki Bank Details, PAN Details hadooh wow phah leh ya ka SIM Card deiwa phah Parcel.
Hadien ini da chem wa ha ka 22 wa 27 tarik u Naisaphra da em boon sien i psiah i mih poisa na ka Bank Account ka diah ko heiwa ka Tripathi Diwarka da pynemkaam ko da ka SIM wa yoh ko na ka diah ko yow thok u chukor ya kiwi ki bru.
Discussion about this post