Kawi ka bru da chah thok ko hadooh T. 10,22,000 ha uwi u bru lyngba ka Facebook, katkam wa pyntip ki pulit.
Kani ka bru wa tip pyrtuid kam ka I. Ritshong da ujor ko ha ki pulit haka 11 tarik uni u bnai wa u bru wa yachem wei da yatoh lok ko ha Facebook uwa tip pyrtuid kam u Harry Robert da thok u ka wow e ya kani ka poisa.
U Harry Robert uwa ym tip wa lada toh uwa em sakhiat, da chakæ u ka kani ka bru deiwa pyntip wa da phah u yaka poisa phareng 1.5 Million Pounds (da tam 9 klur daka poisa India) lyngba kawi ka yusong (Parcel).
Ini ym toh i sien wa nyngkong wa da jia kamni heiwa na ki por cha ki por ki pulit da sneiñ ki yaki paidbah wa ym toh wow yajan wow yatok lok wa ki bru wa ym tipmit ha Facebook neidaw wa em ki bru kiwa chim kabu kiwa da kam wa da poi chadooh i maya wei da kam ki leh wa da phah sñiawbha ki da ki tiar ki tar kamjooh ka poisa. Wei boon ki por kini ki bru kam ki toh kiwa sah cha baar ka ri.
Manda ym poi kini ki tiar, da pyntip ki wa da sah kut kini ki tiar hapoh Custom lane ha Courier hapoh ka ri yong kiwa toh u yoh ya ini i tiar neidaw wa ym em su yaka dan (Tax), kamtæ yow yoh ya kini ki tiar/poisa da e daka Bank Account wow thap poisa kawa man da ka Bank Account yong ki bru samen, wei heini i bynta da chah thok ki bru chiboon neibhah daw paan ma paan poisa ki deiwa ong wa ym pu dap ka poisa yow su yaka bai dan yow pynlait ya ki tiar/poisa wa da phah ki.
