Jowai: Ki pulit da pyntip ki wa kawi ka bru na chnong Barato wa tip kam ka T. Timung da ujor ko wa uwi u bru wa tip kam u Ronalson Dkhar na Lumpyngngad, Shillong da pynyatoh lok u wa u pa ko wei da pynbiej u oo deiwa kular wow pynyoh thaw puræ Nurse ya ka Timung ha Bangalore.
U pa ka Timung nyngkong da su u T. 30,000 ha ka 23.05.15 wei ym em yoh receipt u na u Ronalson. Hadien ini won ha u bnai Khongchonglad (Nov) 2015 da yah u Ronalson ya ka Timung wa 9 ngut kiwa kular u wow pynyoh thaw puræ ha Bangalore tangwa madan poi ha ka thaw puræ da sñiaw phylla ki u yoo wa ka thaw puræ em ko du uwi uwa sikai wei ym em ki tang ka Laboratory.
Da kular wow e thaw puræ ya ki ha Institute of Nursing, Bangalore tangwa da yah ya ki cha Bangalore Technical Institution, Surjapura Road, Kodathi Bangalore-35. District: East Bangalore Karnataka Pin code: 560035 kawa phær na ki kot ki sla wa pynyoo u Ronalson.
Hadien ini, kani ka thaw puræ da paan poisa ko na ki T. 1,03,000 samen tangwa ym em yoh ki i sikai ym em pynman exam wei ha u Khonchonglad (Nov) 2016 da phah liwan yung noh ya ki da kani ka thaw puræ wei ymbien de u pdiang ya ki yow pteiñ yei puræ ki.
Hadien ini ka Timung da li paan biang ko ya ka poisa yong ka na u Ronalson Dkhar uwa su ya ka da ka Cheque ka wym lai ha ki Bank.
Discussion about this post