Ka SBI Laitumkhrah Branch da hap ko wow pynche paidbah hadien wa da yoh ko ki ujor na kiwa boon ki bru kiwa da chah thok poisa ha ka Scheme thok wa tip kam ka “Triple Your Money Scheme (TYM Scheme)”.
Ka SBI Laitumkhrah Branch da ong ko wa ym jooh em kam kani ka Scheme nachwa kamjooh katni leh wei kani ka chnat ka SBI ym jooh em pynbna paidbah ko chaphang kam kani ka Scheme kawa man ka Scheme thok wa da chna hi-eh da ki bru wa chim kabu.
Chooh chooh da ong wa ym tip ki wa kawi kawa kreh (Cleaner) yong ki kawa tip kam ka Jacianta Mary Nongsiej toh kawa pynlang poisa na ki bru hei pyrtuid kani ka Scheme, kamtæ da kyntu ya ki paidbah wow lai ki cha pulit heiyatoh wa ini i kaam.
Uwi na kini kiwa chah thok toh uwa jooh kreh kam u sahep sorkar uwa da lai ujor ha ki pulit wa kani kawa kreh ka SBI Laitumkhrah Branch ka Jacianta Mary Nongsiej da yachem ko wa oo ha yung u deiwa kam toh ka man ko kam ka Insurance Advisor ka SBI Laitumkhrah Branch la 5 snem wei da khana ko ya oo chaphang kani ka Triple Your Money Scheme heiwa ye wow thap poisa katwon katwon kawa palat T. 1 lak wei hapoh chi snem daw ku ka poisa ki da le chah wei kani toh du ya kiwa man kam ki ST kiwa em Account ha ka Laitumkhrah Branch donhi.
Deiwa ngait yeini wa ka Jacianta da khana ko, uni u bru da thap poisa u T. 5 lak neibynta 5 snem wei neiliang ka Jacianta da chim ko leh ya ki kot sla wa emkaam nadooh ki ID deiwa kam wa hap wow lai e ya kini cha Guwahati Office tangwa manda toh u kut ini i por wa chi snem yow yoh biang ya ka poisa haka 06-06-22 wei manda Phone cha kani ka bru da khana ko wa kani ka Scheme da yap noh ko wei daw pynuiñ noh ya ka poisa hapoh chi bnai tangwa hadooh katni leh ym em de yoh ya kani ka poisa.
Sa kawi ka bru da thap poisa ko ha u snem 2021 ha ka Jacianta hi tangwa manda dap chi snem, ka Jacianta da kyntait ko wa chim ko T. 1 lak na kani ka bru.
Sa kawi won ka bru da thap poisa ko T. 2 lak ha ka Jacianta hi wei da toh wow kut i por ha ka 13-06-23 tangwa manda li paan ya kani ka poisa da kyntait ka Jacianta wa chim poisa ko na kani ka bru.
Kini waroh ki bru da e poisa ki khlem da yoh Receipt heiwa ka Jacianta da ong ko wa ya ka Receipt daw yoh ki lyngba ka Speed Post wei heipor wa chim poisa na kini ki bru da pynbiang lut ko ki Form kiwa da yoo paka bha wa ki yong kani ka Bank wei da rah ko leh deilang wa ki kot lakdop (Pamphlet) kiwa da batai chaphang kani ka Scheme.
Discussion about this post