Ha iwi i jia wa sñiaw chyrkhei, kawi ka khynnah wa dang 6 snem da chah thombor ko ha uwi u bru hadooh wa da kbai da kiad ko hadooh wa ka bei ko da wan phet smat ko wow pynlait ya ka khon yow lait na iwon iwon i jia, wei uni u damok da yut noh u.
Ini da jia i ha East Khasi Hills ha i thaw wa dang haap ha ka Madanrting Police Station, wei da pyntip wa ya kani ka khynnah da lai yah cha Ganesh Das Government Maternal and Child Health Hospital yow pait yei long i man ko.
Hawa yoh u yaklam wa ka bei wa u pa kani ka khynah, da ong ki wa ki toh kiwa dang wan sah yung wai thymme ha kani ka chnong wei uni u bru wym tipmit ki da lai psiah u ha yung yong ki wei hadien kattu katni por da lai yah u ya kani ka khynnah cha i yung wa em hajan da i thmu wow leh ki kaam damok hadooh wa ka bei da sñiaw ko yeiwa kiad ka khon kho wei da wan phet ko yow pynlait ka na iwon iwon iwa jia.
Ka bei da ong ko leh wa yoo ko yeiwa pyrchang uni u bru wow leh wei ka khon ko leh da pyntip ko wa da doh u ka na ktien.
Da ong ki leh wa ym tipmit ki ya uni u bru tangwa da wan hi-eh u kamtu yow kylli lada dang chet ja ki wei da mih u na yung tangwa hadien won da sñiaw ki yeiwa kiad ka khon ki.
Neiliang u Superintendent of Police ka East Khasi Hills, u Vivek Syiem da pyntikna u wa em kam ini wa jia wei uni u bru wa suba wa leh ya ini i kaam da yut u, tangwa ki pulit da tipmit ki oo wei toh uwa 24 snem i rta wei uwa na kani ka chnong hi.
Discussion about this post