Ka Ri-Loom Jaintia Traders Association (RJTA) lyngba u President Rangbah yong ka u Paila Kordor Lyngkot dap ko da i sñiawsih wa khroo hawa tip wa boon ki dukan dukdoh ha Iaw Thymme chah tooh ki. Wei ya ini da jia leh ya ka Elda Meri Pyrtuh kawa chong wa sah ha Tyndowapung, Jowai ka wi na ki manbei wa im ja-kpoh da ki kam chongdai heiwa da chah tooh ko ynne ka 27 tarik kamwa 7 churia heh u kwai War wa kiwi kiwi ki marbaam napoh dukan yong ka wa em ha Iaw Thymme, Jowai.
Ini i chah tooh da man i i dooh wa khroo neibhah i dor uni u kwai wa ki mar wa da chah tooh dapoi kamwa T. 2 lak.
Ka seiñ mar ya tip ko ya ini i chah tooh, u President wa chirup wa ki wakreh kaam da lai pait lai sylli ki wei da chem leh wa i dukan kani ka kong da chah tympiah, chah tympra ka dwar ha kiwa tooh.
Ka seiñ dap ko da i wyrai ya kani ka kong wei da beiñ joor ya ini i chah leh dusmon ha ki damok wym tip de u pyrkhat ya i khih i khan yong kiwi.
Ya ini i dukan da yoo ynne i step da ki bru wa da chah khyndang ka pyrthap kiwa da pyntip won cha ka tre.
Ka seiñ da dawa ko leh na ki bor wa toh u pait ya kani ka yaw wow chimkhia ki u takit wow thooh tre ya ini i kaam chah tooh kani ka kong, neibhah ini ym toh i sien wa nyngkong wa jia ki kaam tooh ha ki yaw ki haat. Heiwa da em leh kattu katni ngut kiwa chongdai ha yaw kiwa chah tooh kam ki tarpaulin wa kiwi kiwi ki marbaam wa emkaam.
