Uwi u bru uwa yah Truck da chah tynyap dusmon u deiwa em boon bha ki dak takha wa yillu bha ha i bynta i khlieh, i tymphaad wa kiwi de wei da thiah yap u hei snaam wa boon wa kai.
Nyngkong da pyntip cha ki pulit ynnin i miet da u waheh chnong ka Mukhla wa em ki bru wa ya kajia ha Mukhla Umsuwe hajan i thaw wa em mar pyrchah waka Petrol Pump.
Kamtæ manda poi ki pulit ha ini i thaw wa dang haap ha Ladmukhla, Umsuwe da chem wa ini i thaw wa jia toh mar pyrchah ya ka Pnar Service Station ha iwi i khloo khian heiwa da chem ya iwi i metyap yong u bru uwa da suba toh uwa chah tynyap neidaw wa em boon ki kha wa chah dat chah bom u.
Ya uwa yap da kit cha Jowai Civil Hospital, Ialong yow leh yeiwa emkaam.
Hawa takit ki pulit da chem ki wa uni toh uwa yah ya kawi ka Truck wa em Number NL-01AC-6175 wei hapoh kani ka Truck da chem ya ka Photo Copy ka License wa em i pyrtuid u Sambun Dkhar uwa na ka chnong Mynsngat.
Ha ka Body kani ka Truck da em leh iwi i Phone Number wa da biah chwa ha ka wei manda Phone dapoi cha u tre kani ka Truck wei manda kylli ya oo uyi wa yah ka ka Truck u, da khana u yei pyrtuid u Sambun Dkhar, kamtæ ki pulit da paan ki yei Phone Number u Sambun.
Manda pait ha u WhatsApp ya ini i Number da yoo yei dur (Display Picture) wei da phah ya ini i dur cha u tre Truck uwa da pyntikna wa toh i dur u Sambun.
Neiliang ki pulit da lai pyntip ki cha kiwa ha-yung ha-sem u Sambun Dkhar yow wan ki yow pyntikna wa toh næ ymtoh u Sambun.
Discussion about this post