Ka KSU Narpuh Circle da phah ko ya ka kyrwoh sñiawlem cha kiwa ha-yung ha-sem yong u Chiang Dhar uwa na ka chnong Umkiang Elaka Narpuh uwa da chah tynyap dusmon ha ki nong Bangladesh iwa da jia haka 6 tarik uni u bnai heipor kamwa 3:30 i sngi.
Katkam i pyntip da ki tre chnong, da ong wa ki ar ngut kitæ u Chiang Dhar uwa na Umkiang wa u Rahul Pohtam uwa na Lumsohski da lai ki cha bri kwai yow yang boi ya em ki nong Bangladesh kiwa wan tooh kwai.
Tangwa kini ki ar ngut da chah kdong kylla ki ha ki nong Bangladesh kiwa da wan chi khrui heiwa u Rahul Pohtam da lait im u katwa u Chiang Dhar da chah pam khiar u da ka wait hadooh wa khlaad noh u.
Ini i jia da jia i hajan ka ktem BSF kawa tip kam ka Lamasaki kawa jngai du 500 Meter na katai ka thaw wa jia.
Ka seiñ da ong ko wa ini wa jia da pynsier ko ya ki paradoh parasnaam kiwa em ha kani ka thaaiñ neibhah kam ini i jia da jia ma jia i heiwa dang ini wa dep kawi ka manbei kawa 45 snem kawa na ka chnong Donaskur da chah tynyap ko ha u nong Bangladesh heiwa neiliang ka chnat pulit ym em yoh kem ki hadooh katni.
Ka seiñ da dawa ko na ka sorkar jylla wow chimkhia ya ini wa jia wei wow kyrriah noh ya ki BSF kiwa chong pyrchah aiñ ha yingkieñ Sonapyrdi wa kitu kiwa chna ktem ha mar khap chnong Dona wa Rattacherra wei wow phah noh ki cha khappood ymtoh wow em ki ha ki sarokbah kiwa da jrong kti ya ki paradoh parasnaam yong i.
Kamtæ da ong wa ka sorkar jylla toh u chimkhia ko ya kam ini wa jia wei chah thombor ki paradoh parasnaam yong i kiwa emkaam sakhiat yei yada yow lait u jia ma jia kamni.
Discussion about this post